විදුලි බිල ඉහළ දැමීම සම්බන්ධයෙන් වන අවසන් තීරණය මහජන උපයෝගීතා කොමිෂන් සභාව විසින් අද (15) දිනයේ දී දැනුම්දීමට නියමිතව තිබෙනවා.
සියයට 66ක අගයකින් විදුලි ගාස්තු ඉහළ දැමීමට ශ්‍රී ලංකා විදුලිබල මණ්ඩලය විසින් පසුගිය දා යෝජනාවක් ගෙන එනු ලැබුවා.
කෙසේ වෙතත් ඒ සඳහා මහජන උපයෝගීතා කොමිෂන් සභාවේ අවසරය ලබා නොදීමටයි කටයුතු කරනු ලැබුවේ.
එම තීරණයත් සමඟ මහජන උපයෝගීතා කොමිසම සහ විදුලිබල මණ්ඩලය අතර ඇතිවූයේ අර්බුදකාරී තත්ත්වයක්.
මේ අතර විදුලි ගාස්තු ඉහළ දැමීමක් සිදු නොකරන්නේ නම් ඉදිරියේ දී බරපතල අර්බුදයකට මුහුණදීමට සිදුවන බව විදුලි බල මණ්ඩලයේ නිලධාරීන් සඳහන් කර සිටිනවා.
ඒ, අනුව ඉදිරියේ දී ගල්අගුරු ආනයන කිරීමට පවා මුදල් නොමැතිවීම නිසා දීර්ඝ විදුලි කප්පාදුවකට යාමේ අවධානමක් ද පවතින බවයි ඔවුන් වැඩිදුරටත් සඳහන් කරන්නේ.
මේ අතර සියයට 66ක ගාස්තු ඉහළ දැමීම වෙනුවට විදුලි ගාස්තු සියයට 36කින් ඉහළ දැමීමට මහජන උපයෝගිතා කොමිසමේ සභාපතිවරයා ඉදිරිපත් කළ යෝජනාව එම කොමිසමේ සෙසු සාමාජිකයන් ප්‍රතික්ෂේප කර ඇති බවයි වාර්තා වන්නේ.
