ෆේස්බුක් සමාජ මාධ්‍ය ජාලාව ඔස්සේ විකිණීමට දැන්වීම් පළකර තිබූ යතුරුපැදියක් මිලදී ගන්නා මුවාවෙන් පැමිණ, එය සොරාගෙන පළා ගිය 18 හැවිරිදි තරුණයින් දෙදෙනෙක් සොරාගත් යතුරුපැදිය ද සමඟ අත්අඩංගුවට ගෙන තිබෙනවා.
සැකකරුවන් දෙදෙනා මෙලෙස සොරාගෙන පළා ගොස් ඇත්තේ කැකිරාව, යකල්ල පාර ප්‍රදේශයේ පුද්ගලයෙකුට අයත් යතුරුපැදියක්.
සොරකම සම්බන්ධයෙන් යතුරුපැදියේ හිමිකරු කැකිරාව පොලිස් ස්ථානයට සිදුකළ පැමිණිල්ලකට අනුව, සොරකම සිදු වී පැය 24ක් ගතවීමටත් පෙර සැකකරුවන් දෙදෙනා අත්අඩංගුවට ගැනීමට හැකි වූ බවයි පොලිසිය පැවසුවේ.
අත්අඩංගුවට ගැනුණු සැකකරුවන් දෙදෙනා මහනුවර, තලාතුඔය ප්‍රදේශයේ පදිංචිකරුවන් බවයි වාර්තා වුණේ.
සැකකරුවන් සොරාගත් යතුරුපැදිය මාතලේ, කූමියන්ගොඩ ප්‍රදේශයේ ස්ථානයක සඟවා තිබිය දී පොලිසිය විසින් සොයා ගෙන තිබෙනවා.
යතුරුපැදි හිමිකරු එය විකිණීම සඳහා ෆේස්බුක් සමාජ මාධ්‍ය ජාලාවේ දැන්වීමක් පලකර තිබී ඇති අතර, එය මිල දී ගන්නා ආකාරයෙන් පැමිණ ඇති සැකකාර තරුණයින් දෙදෙනා යතුර පැදිය පරීක්ෂකාර බලා පරීක්ෂණ ධාවනයක් සදහා යැයි පවසා යතුරුපැදිය පණ ගන්වාගෙන එහි නැගී පළා ගොස් ඇති බවයි වාර්තා වුණේ.
