එක රැයකින් රට ම කැලඹූ සාදය ගැන හරීන් කට අරියි (වීඩියෝ)

තමන් කිසිවිටෙක අසාධාරණයක් සිදු වන විට දී කිසිවක් නොදුටු හෝ නො ඇසුණු ස්වභාවයෙන් නොසිටින්නෙකු බව හිටපු අමාත්‍ය හරීන් ප්‍රනාන්දු මහතා පවසනවා.

ඊයේ (29) රාත්‍රියේ දී පැවති වසර අවසාන වාර්ෂික සාදයකට තමන් ද එක් වූ අවස්ථාවේ සිදු වූ කෝලාහලය සම්බන්ධයෙන් දසත ප්‍රවෘත්ති අංශය වෙත අදහස් දක්වමින් අමාත්‍යවරයා සිදු වූයේ කුමක්දැයි පැහැදිලි කළා.

තමන් සුපුරුදු පරිදි සිය පාසල් මිත්‍රාදීන් මුණගැසීමටත්, තමන්ට එම සාදය සඳහා ඇරයුම් ලැබී තිබූ බවත් එබැවින් එම ස්ථානයට ගිය බවත් හිටපු අමාත්‍යවරයා ප්‍රකාශ කළා.

තමන් සිය සගයින් සමග ලබා දී තිබූ අසුනෙහි සතුටු සාමිච්චියෙන් කතා බහ කරමින් සිටියදි කවුරුන් හෝ පුද්ගලයෙකු ”පැරදුණා නම් ගෙදර හිටපං ###” යන ලෙසින් නොසරුප් වචනයෙන් කෑ ගසා ගෙන එතැනින් ඉවත් ගිය බවත් එම අවස්ථාවේදී තමන් ඔහුට ද ප්‍රතිවාදියා පැවසූ ආකාරයෙන් ම උත්තර දුන් බවත් හිටපු මන්ත්‍රීවරයා වැඩිදුරටත් කියා සිටියා.

අදාළ පුද්ගලයා වෙත තමන් ගමන් කිරීමට සැරසුණ ද සිය සගයින් එය වැළැක්වූ බවත් කිසිදු ලෙසකින් සාදයේ දේපොළවලට හෝ තමන් හානි නොකළ බවත් හෙතෙම සිදුවීම සම්බන්ධයෙන් දසත ප්‍රවෘත්ති වෙත සැල කර සිටියා.