වැලිකඩින් පැන්න රැඳවියෙක් බන්ධනාගාර නිලධාරීන් සමඟ පොරබැදීමෙන් පසු මරුට

වැලිකඩ බන්ධනාගාරයේ රැඳවියෙක් බන්ධනාගාර නිලධාරීන් සමඟ ඇති වූ පොරබැදීමකින් පසු රෝගී වී රෝහල් ගත කිරීමෙන් අනතුරුව මියගොස් තිබෙනවා.

මෙම රැඳවියා ඊයේ (03) රාත්‍රියේ මියගොස් ඇති බවයි පොලිස් මාධ්‍ය ප්‍රකාශක සහකාර පොලිස් අධිකාරී උදය කුමාර වුට්ලර් සඳහන් කළේ.

මෙම රැඳවියා ඊයේ (03 පස්වරුවේ බන්ධනාගාර එළිමහනේ පවිත්‍රතා කටයුතුවලට යොදවා ඇති අතර, එම අවස්ථාවේ දී තවත් රැඳවියෙක් සමඟ බන්ධනාගාරයෙන් පලාගොස් ඇති බවයි වාර්තා වුණේ.

පසුව බන්ධනාගාර නිලධාරීන් විසින් සිදුකළ මෙහයුමකින් අනතුරව පැය කිහිපයකට පසු ඔවුන් දෙදෙනා අල්ලා ගැනීමට සමත්ව තිබෙනවා.

එම අවස්ථාවේ දී අදාළ මියගිය රැඳවියා සහ බන්ධනාගාර නිලධාරීන් අතර පොරබැදීමක් සිදුව ඇති අතර, ඉන් අනතුරුව එම රැඳවියා බන්ධනාගාර රෝහල වෙත ඇතුළත් කිරීමටයි කටයුතු කර ඇත්තේ.

පසුව එම රැඳවියා රාත්‍රී 8.37ට පමණ මියගොස් ඇති බව පොලිස් මාධ්‍ය ප්‍රකාශවරයා සඳහන් කර සිටියා.

මෙලෙස මියගොස් ඇති රැඳවියා මත්ද්‍රව්‍ය චෝදනාවකට අච්චු විඳිමින් සිටි වයස අවුරුදු 40ක බොරැල්ල ප්‍රදේශයේ පදිංචිව සිටි අයෙක්.

මේ අතර ඊයේ (03) ගාල්ල බන්ධනාගාරයෙන් පැන පලායාමට උත්සාහ කළ රැඳවියන් දෙදෙනෙකුට බන්ධනාගාර නිලධාරීන් විසින් වෙඩි තැබීමක් සිදුකර තිබුණා.

එම අවස්ථාවේ එක් රැඳවිකුට වෙඩි වැදීමෙන් තුවාල ලබා රෝහල් ගත කිරීමටයි පියවර ගෙන තිබුණේ.