උඩප්පුව ප්රදේශයේ පාසලක ගුරුවරියක් විසින් තම ගෙළෙහි තිබූ රන් මාලය ගලවා තබා තිබියදී එය සොරකම් කළ තවත් ගුරුවරියක් පොලිස් අත්අඩංගුවට ගෙන තිබෙනවා.
මෙම ගුරුවරිය තමාගේ ගෙල බැඳි රුපියල් ලක්ෂ 22ක් පමණ වටිනා රන් තැල්ල ගලවා මුදල් පසුම්බියක දමා තිබියදී එය එම විද්යාලයේ ම ගුරුවරියක් විසින් සොරකම් කර ඇති බවටයි අනාවරණ වී ඇත්තේ.
උඩප්පුව ආඬිමුනෙ පදිංචි 26 හැවිරිදි සැකකාර විවාහක ගුරුවරිය උඩප්පුව පොලිසිය විසින් අද උදෑසන අත් අඩංගුවට ගෙන තිබෙනවා.
පොලිසිය පවසන්නේ අදාළ පාසලේ 26 හැවිරිදි ගුරුවරියකට ඇයගේ සැමියා විසින් මංගල දින ගෙලට දමන ලද රන් තැල්ල සහ මාලය පාසලට දමා ගෙන පැමිණ සිටියදී සොරකම සිදුවී ඇති බවයි.
එම ගුරුවරියගේ ගෙල ප්රදේශයේ ඇති වූ කැසීමක් හේතුවෙන් අදාළ රන් තැල්ල සහ මාලය ගලවා මුදල් පසුම්බියට දමා දරුවන්ට ඉගැන්වීම් සිදු කර තිබෙනවා.
ඒ සමගම මෙම ගුරුවරිය ඇතුළු ගුරු මණ්ඩලයට උදෑසන 8.30ට පමණ විදුහල්පතිවරයා විසින් රැස්වීමක් පවත්වා ඇති අතර එය අවසන් වී ඇත්තේ 11.30ට පමණ බව සඳහන්.
රැස්වීම අවසන් වී නැවත පංති කාමරයට ගිය මෙම ගුරුවරිය මුදල් පසුම්බියට දැමූ රන් මාලය හා තැල්ල නොමැති බව දැන ගැනීමෙන් පසු එය සොයා ඇති අතර එය කිසිවකු විසින් සොරා ගෙන ඇති බවට වැටහීමෙන් පසු විදුහල්පතිවරයාට දැනුම්දී තිබෙනවා.
රන් මාලය සහ තැල්ල පිළිබඳව කිසිදු හෝඩුවාවක් නොලැබීම හේතුවෙන් මෙම ගුරුවරිය සිසු සිසුවියන්ගෙන් විමසා ඇත්තේ තමන් විදුහල්පති කාමරයට ගිය පසු පංති කාමරයට කිසිවකු පැමිණියේ ද යන්නයි.
එහිදී දැන ගන්නට ලැබී ඇත්තේ වෙනත් ගුරුවරියක් පැමිණ මෙම ගුරුවරියගේ බෑගය විවෘත කර කිසිවක් සොයා ආපසු යන ආකාරය දුටු බවයි.
මේ පිළිබඳ උඩප්පුව පොලිසියට කළ පැමිණිල්ලෙන් පසුව සැකකාර ගුරුවරියගෙන් පොලිස් නිලධාරීන් දිර්ඝව ප්රශ්ණ කිරීම් සිදු කර තිබෙනවා.
එම සැකකාර ගුරුවරිය සිදු කළ ප්රකාශවලින් හෙළිවී ඇත්තේ පාසලේ ආරක්ෂිත වැටක් අසල වැලි සහිත පොළොවේ කුඩා වලක් අතින් හාරා එහි මෙම රන් මාලය හා රන් තැල්ල සඟවා ඇති බවයි.
එම ස්ථානයේ තිබී අදාළ රන් මාලය සහ තැල්ල සොයා ගැනීමට පොලිසිය සමත්වී තිබෙනවා.
සැකකාර ගුරුවරිය පුත්තලම අධිකරණයට ඉදිරිපත් කිරීමට නියමිතව තිබුණා.
