පොලිස් අණ නොතකා පලායමින් සිටි වෑන් රථයක් නැවැත්වීම සඳහා පොලිසිය සිදුකළ වෙඩි තැබීමක් හේතුවෙන් තරුණයෙක් ජීවිතක්ෂයට පත්වීමේ පුවතක් පසුගිය (10) වැනිදා වාර්තා වුණා.
කයිට්ස් පොලිසිය විසින් එදින රාත්‍රියේ අල්ලපිඩ්ඩි හන්දිය ආසන්නයේදී ධාවනය වෙමින් පැවති සැක කටයුතු වෑන් රථයක් නැවැත්වීම සඳහා සංඥා කර ඇති අතර එම වෑන් රථය අණ නොතකමින් මණ්ඩතිව් දෙසට ධාවනය කර තිබෙනවා.
ඒ අවස්ථාව වන විට මණ්ඩතිව් මාර්ග බාධකය පරීක්ෂාව සඳහා ගොස් අල්ලපිඩ්ඩි දෙසට ගමන් කරමින් තිබූ කයිට්ස් ස්ථානාධිපතිගේ ජීප් රථයට මේ සම්බන්ධයෙන් දැනුම් දීමට වෑන් රථය නැවත්වීමට සංඥා කළ නිලධාරීන් දැනුම් දී තිබෙනවා.
ඒ අනුව ක්‍රියාත්මක වූ පොලිස් ජීප් රථයේ නිලධාරීන් වෑන් රථය නවත්වා ගැනීම සඳහා උත්සාහ කළද තවදුරටත් වෑන් රථය ධාවනය කළ නිසා පොලිසිය අහසට වෙඩි තබා ඇති අතර ඒ අවස්ථාවේදීත් නොනවත්වා පලා ගිය නිසාවෙන් වෑන් රථය නවතා ගැනීම සඳහා පොලිසිය වෑන් රථයට සිදුකළ වෙඩි තැබීමක් හේතුවෙන් වෑන් රථයේ රියදුරු වෙඩිවැදී තුවාල ලබා යාපනය රෝහලට ඇතුළත් කිරීමෙන් පසු ජිවිතක්ෂයට පත් වුණා.
එලෙස ජීවිතක්ෂයට පත්වුණේ වයස අවුරුදු 17ක් වූ වඩුකෝට්ටේ ප්‍රදේශයේ පදිංචිකරුවෙක්.
මේ අතර ජිවිතක්ෂයට පත් වූ තරුණයාගේ අවසන් කටයුතු වඩුකෝට්ටෙයි – චිත්තන්කේරිනි හි ඔහුගේ නිවසේදී අද (12) දිනයේ දී සිදු කෙරෙන අතර ඔහුගේ ඥාතීන් විසින් තරුණයාගේ මෘත ශරීරය අවස කටයුතු සඳහා රැගෙන යන අතරතුර ඔහුගේ මරණය සම්බන්ධයෙන් වගකිව යුතු පොලිස් නිලධාරීන්ට එරෙහිව නීතිය ක්‍රියාත්මක කරන ලෙස ඉල්ලමින් විරෝධත්වයේ නිරත වුණා.
