පොලිස් රාජකාරීවලට බාධා සිදු කරමින්, රාජකාරියේ නියුතු පොලිස් නිලධාරීන්ට පහරදීමේ සිද්ධිය සම්බන්ධයෙන් අත්අඩංගුවට ගත් සැකකරුවන් පස්දෙනා රක්ෂිත බන්ධනාගාරගත කිරීමට අධිකරණය නියෝග කර තිබෙනවා.
ඊයේ (09) රාත්‍රී කාලයේ බේරුවල ධීවර වරාය ප්‍රදේශයේ දීයි මෙම පහරදීම සිදු වූයේ.
සැකකරුවන් ඊයේ රාත්‍රියේ දී ම අත්අඩංගුවට ගෙන අද (10) දහවල් කළුතර මහේස්ත්‍රාත් අධිකරණයට ඉදිරිපත් කළා.
එහිදී කළුතර මහේස්ත්‍රාත් අධිකරණයේ අතිරේක මහේස්ත්‍රාත්වරයා නියෝග කළේ සැකකරුවන් දින 14ක් රක්ෂිත බන්ධනාගාරගත කරන ලෙසටයි.
බේරුවල ධීවර වරාය ආසන්නයේ පොලිසිය සහ බෞද්ධ කොඩි එල්ලමින් සිටි පිරිසක් අතර ඇති වූ කතාබහක් දුරදිග යාමෙන් පසු පොලිසියට පහර දුන් බවට සැකකරුවන් පස්දෙනාට චෝදනා එල්ල වී ඇති අතර ඔවුන් ව පාලනය කිරීමට පොලිසිය අහසට ද වෙඩි තැබුවා.
බේරුවල වරාය ආසන්නයේ පිරිසක් ලොරි රථයක නැගී බෞද්ධ කොඩි එල්ලමින් සිට ඇති අතර, මාර්ගය අවහිර නොකරන ලෙසට පොලිසිය උපදෙස් දී තිබෙනවා.
එහිදී දෙපාර්ශ්වය අතර උණුසුම් වචන හුවමාරුවක් සිදු ව ඇති අතර එය දුරදිග යාමෙන් පසු අදාළ සැකකරුවන් පොලිසියට පහර දී ඇති බවයි අප වාර්තාකරු පැවසුවේ.
සැකකරුවන්ගේ පහරදීම්වලින් තුවාල ලැබූ පොලිස් නිලධාරීන් තිදෙනා මේ වනවිට කළුතර ශික්ෂණ රෝහලේ ප්‍රතිකාර ලබනවා.
