ශ්රී පාදස්ථාන මළුව අවට මේ දිනවල ඇදහැලෙන අධික වර්ෂාවත් සමග ශ්රී පාද කඳුමුදුනේ ගල් පර්වතයේ වැවී තිබූ ශාක කොටස් කිහිපයක් පස් සමඟ ශ්රී පාද මාර්ගයට කඩා වැටී තිබෙනවා.
මේ හේතුවෙන් නල්ලතන්නිය ශ්රී පාද මාර්ගය අවහිර වී ඇතැයි නල්ලතන්නිය පොලීසිය පවසනවා.
නල්ලතන්නිය ශ්රී පාද මාර්ගයේ මීට පෙර ද ශාක සහිත පස් කඳු කඩා වැටුණු ඇහැල කණුව ආසන්නයේම මෙවරත් එම පස් කන්ද ශ්රී පාද මළුවට පිවිසෙන පියගැටපෙළ මත වැටී ඇති බවයි වාර්තා වන්නේ.
මේ දිනවල ශ්රී පාද අවාරයේ ශ්රී පාද මළුව දක්වා ගමන් ගන්නා දෙස් විදෙස් සංචාරකයන්ට ඉදිකටු පහණ හරහා රත්නපුර මාර්ගයට පිවිස ශ්රී පාද උඩමළුව දක්වා යැමට හැකි බවත්, පවතින අයහපත් කාලගුණ තත්ත්වය පහව ගිය පසු එම මාර්ගයට කඩා වැටුණු ශාක සහ පස් කන්ද ඉවත් කිරීමට කටයුතු කරන බව නල්ලතන්නිය පොලිස් ස්ථානාධිපතිවරයා පැවසුවා.
