එල්.ටි.ටි.ඊ සංවිධානයේ පෝස්ට් මුහුණු පොත තුළින් සමාජ මාධ්‍ය ඔස්සේ ප්‍රචාරය කරමින් ජාතීන් අතර සංහිඳියාව බිඳී යන කරුණු සමාජගත කිරීමේ සිද්ධියක් සම්බන්ධව වන පැමිණිල්ලකට අදාළ ව “නාමල් කුමාර” යන අය ලබන 23 වැනිදා දින අධිකරණයට ඉදිරිපත් කරන ලෙස මීගමුව බන්ධනාගාර අධිකාරීවරයාට කොළඹ ප්‍රධාන මහේස්ත්‍රාත් තනූජා ලක්මාලි මහත්මිය අද (21) නියෝග කළා.
රජයේ ප්‍රවෘත්ති අධ්‍යක්ෂ ජනරාල් එච්.එස්.කේ.ජේ .බණ්ඩාර මහතා කරන ලද පැමිණිල්ලකට අනුව අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන ඒකකය මඟින් සිදුකළ කරුණු දැක්වීමක් සලකා බැලූ ප්‍රධාන මහේස්ත්‍රාත්වරිය මෙම නියෝගය නිකුත් කළා.
සැකකරු මේ චෝදනාවට හා සමාන වරදක් කිරීම සම්බන්ධයෙන් කොටුව මහේස්ත්‍රාත් අධිකරණය මගින් රක්ෂිත බන්ධනාගාර ගත කර ඇති බවත්, නාමල් කුමාර මෙම නඩුවේ සැකකරුවකු ලෙස නම් කර ඇති බැවින් ලබන 23 වැනි දින ඔහු අධිකරණයට ඉදිරිපත් කරන ලෙසට නියෝග කරන ලෙසට අපරාධ පරීක්ෂණ දෙපාර්තමේන්තුවේ විමර්ශන නිලධාරීන් අධිකරණයෙන් ඉල්ලා සිටියා.
අත්තනායක මුදියන්සේලාගේ නාමල් කුමාර යන සැකකරු ඔහුගේ නමින්, ඔහුගේ බිරිඳ හා බිරිඳගේ මවගේ නමින් මිල දී ගත් දුරකථන සිම්පත් භාවිතා කර ෆේස්බුක් සමාජ මාධ්‍ය ගිණුම් පවත්වාගෙන ගොස් ඇති බවත්, එමගින් එල්ටීටීඊ සංවිධානයේ ධජ, ක්‍රියාකාරකම්, ලාංඡන හා වෙනත් තොරතුරු ප්‍රචාරය කරමින් ජාතීන් අතර සංහිඳියාව බීදී යන ආකාරයේ පෝස්ට් පළකර ඇති බවත් විමර්ශන නිලධාරීන් කරුණු දක්වමින් අධිකරණයට පවසා සිටියා.
සැකකාර නාමල් කුමාර යන අයගේ නමින් හා වෙනත් අනුවර්ත නාමවලින් පවත්වාගෙන ගිය ෆේස්බුක් සමාජ මාධ්‍ය ඔහු විසින්ම හසුරුවා ඇති බවට විමර්ශනවලින් අනාවරණය වූ හෙයින් මෙම පැමිණිල්ල ගොනු කරන බවත් විමර්ශන නිලධාරීන් දන්වා සිටියා.
සැකකරු ත්‍රස්තවාදයේ වැළැක්වීමේ පනත යටතේ වරදක් සිදු කර ඇති බවට සාක්ෂි මඟින් අනාවරණය වන හෙයින් මෙම පැමිණිල්ල ගොනු කරන බව ද ඔහු අධිකරණයට ඉදිරිපත් කරන ලෙසට මීගමුව බන්ධනාගාර අධිකාරීවරයාට නියෝග කරන ලෙස ද විමර්ශන නිලධාරීන් වැඩිදුරටත් ඉල්ලා සිටියා.
