ඉන්දියාවේ පළමු වරට නවදිල්ලි හා ශ්‍රී නගර් යා කෙරෙන වැන්ඩේ භාරත් ස්ලීපර් දුම්රිය සේවාව

ඉන්දියාවේ ආරම්භ කෙරෙන පළමු ‘වැන්ඩේ භාරත් ස්ලීපර් දුම්රිය සේවාව’ (Vande Bharat Sleeper train) එළඹෙන ජනවාරි මාසයේ සිට ක්‍රියාත්මක කෙරෙනවා.

ඉන්දීය මාධ්‍ය වාර්තා කළේ; මෙම නව දුම්රිය සේවය මගින් නව දිල්ලි නුවර සහ ශ්‍රී නගර් සම්බන්ධ කිරීමට යෝජනා වී ඇති බවයි.

මෙම ව්‍යාපෘතිය ඉන්දීය රජය සහ ඉන්දීය දුම්රිය සේවා දෙපාර්තමේන්තුව එක්ව ක්‍රියාත්මක කරනවා.

අර්ධ අධිවේගී දුම්රිය මාර්ගයක් ලෙස ස්ථාපිත මෙය උදම්පූර් – ශ්‍රීනගර් – බැරමුල්ල (USBRL) මත ධාවනය වන අතර මගීන්ට නවීන පහසුකම් සමඟ වැඩිදියුණු කළ සංචාරක අත්දැකීමක් ලබාදෙනු ඇති.

BEML විසින් නිෂ්පාදනය කරන ලද, Vande Bharat Sleeper දුම්රිය දිගු දුර සහ රාත්‍රී ගමන් සඳහා ඉදිකර තිබෙනවා.

දුම්රියේ මූලාකෘතිය 2024 සැප්තැම්බර් මාසයේදී දුම්රිය අමාත්‍ය Ashwini Vaishnaw විසින් එළිදක්වනු ලැබුවා.

පීටීඅයි වාර්තාවකට අනුව, නවදිල්ලියේ සිට ශ්‍රී නගර් දක්වා වැන්දේ භාරත් ස්ලීපර් දුම්රිය සේවාව 2025 ජනවාරි මාසයේ දී අගමැති නරේන්ද්‍ර මෝදි විසින් ආරම්භ කරනු ලබන අතර ඉන්පසු කඩිනමින් වාණිජ සේවා ආරම්භ කිරීමට නියමිතයි.

Vande Bharat Sleeper දුම්රිය නවදිල්ලිය සහ ශ්‍රීනගර් අතර කිලෝමීටර 800කට වඩා වැඩි දුරක් පැය 13කට අඩු කාලයකින් අවසන් කරනවා.

මෙම සේවාව මගින් නවදිල්ලිය සහ දැනට එවැනි සෘජු සම්බන්ධතාවක් නොමැති කාශ්මීර නිම්නය අතර ප්‍රථම වරට සෘජු දුම්රිය සම්බන්ධතාවක් ද ලබාදෙනු ඇති.