පන්දුවාර විස්සයි විස්ස කාන්තා ලෝක කුසලාන ක්‍රිකට් තරගාවලියේ අවසන් මහා තරගයට සුදුසුකම් ලබන්නට සත්කාර දකුණු අප්‍රිකානු කාන්තා කණ්ඩායමට ඊයේ (24) හැකියාව ලැබුණා.
ඒ, තරගාවලියේ දෙවන අවසන් පූර්ව තරගයේ දී එංගලන්ත කාන්තා කණ්ඩායම ලකුණු 06කින් පරාජය කරමින්.
මෙම තරගයේ පළමුව පන්දුවට පහරදුන් දකුණු අප්‍රිකානු කණ්ඩායම නියමිත පන්දුවාර 20 තුළ කඩුලු හතරකට රැස්කළ ලකුණු සංඛ්‍යාව 164ක්.
ලකුණු 165ක ඉලක්කයක් හඹා ගිය එංගලන්ත කාන්තා කණ්ඩායමට නියමිත පන්දුවාර 20 තුළ කඩුලු 08ක් දැවී රැස්කරගත හැකි වූයේ ලකුණු158ක් පමණයි.
ඒ, අනුව මෙම තරගය ලකුණු 06කින් ජයගෙන 2023 කාන්තා 20-20 ලෝක කුසලාන ක්‍රිකට් තරගාවලියේ අවසන් මහා තරගය සඳහා දකුණු අප්‍රිකාව සුදුසුකම් ලැබුවා.
දකුණු අප්‍රිකානු ක්‍රිකට් කණ්ඩායමක් ලෝක කුසලාන තරගාවලියක අවසන් මහා තරගය සඳහා සුදුකම් ලැබූ ඉතිහාසයේ පළමු අවස්ථාව මෙය වීම ද විශේෂත්වයක්.
මේ අතර මෙවර තරගාවලිය ආරම්භ කරමින් දකුණු අප්‍රිකාව මුහුණ දුන් පළමු තරගයෙන් ශ්‍රී ලංකා කාන්තා කණ්ඩායම ඉදිරියේ පරාජයට පත් වුණා.
2023 කාන්තා 20-20 ලෝක කුසලාන ක්‍රිකට් තරගාවලියේ අවසන් මහා තරගය සඳහා ඕස්ට්‍රේලියානු ක්‍රීඩිකාවන් පෙරේදා දිනයේ දී සුදුසුකම් ලැබුවා.
