දිට්වා සුළි කුණාටුවෙන් හානියට පත් වූ රට යළි ගොඩනැංවීම අරමුණු කරගත් ‘Rebuilding Sri Lanka’අරමුදලට ආධාර රැස් කිරීමේ අරමුණින් ලෝක ශූර ඉන්දීය කණ්ඩායම ශ්‍රී ලංකාව සමඟ විස්සයි විස්ස තරගාවලියක් ක්‍රීඩා කිරීමේ සූදානමක් පවතින බව ජනප්‍රිය ක්‍රීඩා වෙබ් අඩවියක්වන ක්‍රික්බස් වෙබ් අඩවිය පවසනවා.
තරග තුනකින් සමන්විත විස්සයි විස්ස තරගාවලියක් වෙනුවෙන් ශ්‍රී ලංකා ක්‍රිකට් ආයතනය කළ ඉල්ලීමකට අනුව ඉන්දීය ක්‍රිකට් පාලක මණ්ඩලය ඒ සම්බන්ධයෙන් සලකා බලමින් සිටින බවයි වාර්තා වන්නේ.
ඉන්දීය ටෙස්ට් කණ්ඩායම සහ ශ්‍රී ලංකාව අතර එළඹෙන ජූලි-අගෝස්තු මාසවල තරග දෙකකින් සමන්විත ටෙස්ට් තරගාවලියකට එක්වීමට නියමිතව තිබෙනවා.
එම ටෙස්ට් තරගාවලියට පෙර මෙම විස්සයි විස්ස තරගාවලිය පැවැත්වීමටයි වැඩි අවදානයක් යොමුව ඇත්තේ.
