අභාවප්රාප්ත ජ්යෙෂ්ඨ මාධ්යවේදී වික්ටර් අයිවන් මහතාගේ දේහය පිළිබඳ අවසන් කටයුතු අද (20) සිදු කිරීමට නියමිත ව තිබෙනවා.
දැඩි අසනීප තත්ත්වයෙන් කලක සිට පෙලුණු ඒ මහතා ගාල්ල ප්රදේශයේ පිහිටි සිය නිවසේ දී අභාවප්රාප්ත වුණා.
අභාවප්රාප්ත වන විට ඒ මහතා 75 වැනි වියෙහි පසුවුණා.
වික්ටර් අයිවන් මහතාගේ ඉල්ලීම මත ඔහුගේ අවසන් කටයුතු පැය 24ක් තුළ සිදු කිරීමට නියමිත යි.
ඒ අනුව අවසන් කටයුතු අද පස්වරු 5.00ට ගාල්ල, දඩල්ල පොදු සුසාන භූමියේ දී සිදු කිරීමට නියමිත බවයි පැවසෙන්නේ.
මෙරට ගවේෂණාත්මක මාධ්ය කලාවේ පුරෝගමියෙක් ලෙස ජ්යෙෂ්ඨ මාධ්යවේදී වික්ටර් අයිවන් මහතා ප්රකට අතර කලක් ජනතා විමුක්ති පෙරමුණේ සාමාජිකයකු වු වික්ටර් අයිවන් “පොඩි අතුල” නමින් පක්ෂ ක්රියාකාරීන් විසින් හඳුන්වනු ලැබුවා.
ප්රබල දේශපාලනඥයන්, රාජ්ය නිලධාරීන් මෙන් ම මෙරට හිටපු අගවිනිසුරුවරයෙකු වූ සරත් එන්. සිල්වා පිළිබඳ ඔහු ‘රාවය’ පුවත්පතේ සිදුකළ වාර්තාකරණය අදටත් ජනප්රියයි.
