අනුන්ගේ ඉඩමක් නිසා හිරේ විලංගුවේ වැටුණු රාජ්‍ය නිලධාරීන්

මාතර ප්‍රදේශයේ කාන්තාවකට හිමි ඉඩමක කොටසක් ඔහුගේ වැඩිමහල් දරුවාගේ බිරිඳට කිසිදු ගැටලුවකින් තොරව නිරවුල් කර වෙන්කරදීමට හා ඉඩම පරීක්ෂා කිරීම වෙනුවෙන් ඉඩම හිමි කාන්තාවගෙන් රුපියල් 5000ක මුදලක් අල්ලසක් ලෙස ලබාගත් බව කියන සහකාර ඉඩම් කොමසාරිස්වරයෙකු සහ එහි සෙසු නිලධාරියකු ලබන 31 දක්වා රක්ෂිත බන්ධනාගාරගත කරන ලෙස ප්‍රධාන මහේස්ත්‍රාත් තනුජා ලක්මාලි මහත්මිය ඊයේ (21) නියෝග කළා.

මාතර – කොට්ටවත්ත ඉඩම් ප්‍රතිසංස්කරණ කොමිෂන් සභාවේ සහකාර කළමනාකරුවකු වන නිහාල් ද සිල්වා සහ එහි තවත් නිලධාරියකු වන තරංග රාජිව් යන නමැත්තෙකු එසේ රක්ෂිත බන්ධනාගාරගත කරනු ලැබුවා.

මොරවක ප්‍රදේශයේ කාන්තාවක් අල්ලස් හෝ දූෂණ විමර්ශන කොමිසම වෙත කරන ලද පැමිණිල්ලක් අනුව සැකකාර පුද්ගලයන් දෙදෙනා අත්අඩංගුවට ගෙන තිබෙනවා.

සිද්ධිය සම්බන්ධයෙන් කරුණු දැක්වූ අල්ලස් හෝ දූෂණ විමර්ශන කොමිසමේ නිලධාරීන් අධිකරණය හමුවේ කියා සටියේ සැකකාර පුද්ගලයන් අදාළ ඉඩම පරීක්ෂා කිරීමට ගිය අවස්ථාවේ දී උපාය දූතයන් දෙදෙනෙකු යොදවා සිදුකළ විමර්ශනයකින් අනතුරුව සැකකාර පුද්ගලයන් දෙදෙනා අදාළ අල්ලස් මුදල ද සමග අත්අඩංගුවට ගත් බවයි.

තම සේවාදායකයා වන සැකකාර කළමනාකාර සහකාරවරයා කිසිදු අල්ලස් ලබාගෙන නොමැති බව අනාවරණය වන බැවින් ඇප මත මුදා මුදා හැරීමට පියවර ගන්නා ලෙස අධිකරණයෙන් ඉල්ලීමක් ද සිදු කළා.

සැකකාර පුද්ගලයන් දෙදෙනා ඉකුත් 8 වන දින මොරවක මහේස්ත්‍රාත් අධිකරණයට ඉදිරිපත් කිරීමෙන් අනතුරුව එම අධිකරණයේ නියෝගයක් මත කොළඹ මහේස්ත්‍රාත් අධිකරණය වෙත යොමු කර තිබුණා.