බදුල්ල – මහියංගන ප්‍රධාන මාර්ගයේ අඹගස්ඔය ප්‍රදේශයේ දී (දුන්හිඳ ප්‍රවේශ මාර්ගයට නුදුරින්) අද (01) උදෑසන බස් රථයක් පෙරළී ගොස් දරුණු අනතුරක් සිදුවුණා.
උදෑසන 7.45ට පමණ සිදු වූ මෙම අනතුරින් ජෝන් කොතලාවල ආරක්ෂක විශ්වවිද්‍යාලයේ සිසුවියන් දෙදෙනෙක් ජීවිතක්ෂයට පත්ව තවත් 35 දෙනෙක් තුවාල ලබා තිබෙනවා.
තුවාල ලැබූවන් සියලුම දෙනා බදුල්ල මහ රෝහල වෙත ඇතුළත් කිරීමටයි කටයුතු කර තිබුණේ.
අනතුර සිදුව අවස්ථාවේ දී ජෝන් කොතලාවල ආරක්ෂක විශ්වවිද්‍යාලයේ දක්ෂිණ මණ්ඩපයේ සිදු සිසුවියක් 37 දෙනෙක් ඇතුළු 41 දෙනෙකු බස් රථය තුළ සිට ඇති බවයි පොලිසිය පැවසුවේ.
රෝහල් ගත කර සිටින සිසු සිසුවියන්ගෙන් කීපනෙනෙකු බරපතල තත්වයේ සිටින බව රෝහල් ආරංචි මාර්ග සඳහන් කළේ.
මෙම පිරිස අධ්‍යන චාරිකාවක් සඳහා පස්සර ප්‍රදේශයට ඊයේ (31) පැමිණ තිබූ අතර, අද (01) ඔවුන් කුරුණෑගල බලා ගමන් කරමින් සිටිය දී මම අනතුරට මුහුණ පා ඇති බවයි වාර්තා වුණේ.
ආරක්ෂක නිලධාරීන් සහ ප්‍රදේශවාසීන් එක්ව බැකෝ යන්ත්‍ර ආධාරයෙන් මහත් පරිශ්‍රමයක් දරා පෙරළී ගිය බස් රථය යළි කෙලින් කිරීමට කටයුතු කළ බවයි වාර්තාකරු සඳහන් කළේ.
බදුල්ල නියෝජ්‍ය පොලිස්පති සුජිත් වෙදමුල්ලගේ උපදෙස් මත බදුල්ල පොලීසිය අනතුර සම්බන්ධයෙන් පරීක්ෂණ පවත්වනු ලබනවා.
