ලංකා ප්රිමියර් ලීග් තරගාවලියේ අවසන් වටයේ තීරණාත්මක තරගය අද (21) රාත්රියේ පැවැත් වීමට නියමිතයි.
ජැෆ්නා කිංග්ස් හා දඹුල්ල ජයන්ට්ස් අතර පැවැත්වෙන මෙම තරගයෙන් ජය ගන්නා කණ්ඩායමට ගෝල් ග්ලැඩියේටර්ස් කණ්ඩායම සමඟ අවසන් මහා තරගය සඳහා සුදුසුකම් ලැබීමේ අවස්ථාව උදාවනවා.
මෙම තරගය ජය ගැනීම වෙනුවෙන් කණ්ඩායමේ දෙකම තමන්ට ඇති ප්රබලතම තුරුම්පු පාවිච්චි කරනු ඇති බවටයි ක්රිකට් විචාරකයින් මත පළකරන්නේ.
මෙම තරගයේ දී ජැෆ්නා කිංග්ස් කණ්ඩායමේ වනිඳු හසරංග ප්රමුඛ ප්රබල දඟ පන්දු බල ඇණිය සම්බන්ධයෙන් දඹුල්ල ජයන්ට්ස් කණ්ඩායම වැඩි අවදානයක් යොමු කරනු ඇති.
එමෙන්ම මෙවර LPL තරගාවලියේ නවතම සොයා ගැනීම වන ජනිත් ලියනගේ ප්රමුඛ දඹුල්ල ජයන්ට්ස් කණ්ඩායමේ මැද පෙළ පිතිකරුවන් කෙරෙහි වැඩි අධ්යයනයක් සිදුකර ජැෆ්නා කිංග්ස් කණ්ඩායම අද තරගය සඳහා අවතීර්ණ වනු ඇති.
මේ අතර දඹුල්ල ජයන්ට්ස් කණ්ඩායමේ නිත්ය නායක දසුන් ශානකට මෙම තරගයත් අහිමි වන බවට තොරතුරු වාර්තා වනවා.
පසුගියදා පැවති කැන්ඩි වෝරියර්ස් සමග තරගයේ දී ඔහු පිට කොන්දේ ආබාධයකට ගොදුරු වූ අතර මේ වනවිට ප්රතිකාර කිරීම ආරම්භ වී ඇතත් දසුන් පුර්ණ සුවය ලබා නොමැති බවයි හම්බන්තොටින් වාර්තා වන්නේ.
මේ අතර ජැෆ්නා කිංග්ස් කණ්ඩායමේ ප්රධාන පුහුණුකරු තිළිණ කණ්ඩම්බි පවසන්නේ තම කණ්ඩායමට අවසන් තරගයට සුදුසුකම් ලැබීමට හැකියාව පවතින බවයි.
පසුගිය තරග කිහිපයේ දී පිතිකරුවන් ලකුණු අතරට නො පැමිණියත් අද තරගයේ දී ලකුණු අතරට පැමිණීමට තරම් අත්දැකීම් ඇති පිතිකරුවන් පිරිසක් තම කණ්ඩායම සතු බවයි ඔහු වැඩිදුරටත් ප්රකාශ කළේ.
