ඉකුත් රජය සමයේ E විදේශ ගමන් බලපත්ර මිලියන පහක් මිල දී ගැනීම සඳහා ලබා දුන් ටෙන්ඩරයට එරෙහිව ගොනුකර තිබෙන පෙත්සම විභාගය සඳහා මාර්තු මස 19 වැනිදා කැඳවන ලෙස අභියාචනාධිකරණය දින නියම කෙරුණා.
ඒ පෙත්සම ඊයේ (22) අභියාචනාධිකරණ විනිසුරු මොහොමඩ් ලෆාර් තාහීර් මහතා ඉදිරියේ කැඳවනු ලැබුවා.
එහි දී පෙත්සම ඉදිරිපත් කළ එපික් ලංකා පුද්ගලික සමාගම වෙනුවෙන් පෙනී සිටි ජනාධිපති නීතිඥ විරාන් කොරයා අධිකරණය හමුවේ කරුණු දක්වමින් මෙය හදිසි නඩු කටයුත්තක් බැවින් විභාගය සඳහා කෙටි දිනයක් ලබාදෙන ලෙස ඉල්ලා සිටියා.
ඊට විරුද්ධත්වය පළ කළ වගඋත්තරකාර පාර්ශ්වයේ නීතිඥවරයෙකු සඳහන් කළේ තමන්ට වැඩිදුර විරෝධතා ගොනු කිරීම සඳහා කල් ලබාදෙන ලෙසයි.
ඒ අනුව වැඩිදුර විරෝධතා ඉදිරිපත් කිරීම සඳහා කල් ලබාදුන් විනිසුරුවරයා පෙත්සම් පිළිබඳ විභාගය මාර්තු මස 19 වනදා පැවැත්වීමට දින නියම කළා.
මෙම පෙත්සමේ වග උත්තරකරුවන්ගේ නම් සංශෝධනය කිරීමට අවසර ලබා දෙන ලෙස පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥවරයා කළ ඉල්ලීමට ද අධිකරණය විසින් අවසර ලබා දෙනු ලැබුවා.
