අත්අඩංගුවට ගත් පුද්ගලයෙකු මියයාමේ සිද්ධියට අදාළව අපරාධ පරීක්ෂණ දෙපාර්තමේන්තුව මගින් අත්අඩංගුවට ගත් පොලිස් මත්ද්‍රව්‍ය නාශක කාර්යාංශයේ නිලධාරීන් 7 දෙනා ලබන 23 වනදා දක්වා රක්ෂිත බන්ධනාගාර ගතකර තිබෙනවා.
ඔවුන් අද මාළිගාකන්ද මහේස්ත්‍රාත් අධිකරණය හමුවට ඉදිරිපත් කිරීමෙන් අනතුරුවයි මෙම නියෝගය ලබාදුන්නේ.
පොලිස් මත්ද්‍රව්‍ය නාශක කාර්යාංශයේ නිලධාරීන් අත්අඩංගුවට ගෙන සිටියදී මියගොස් තිබුණේ නාරාහේන්පිට වෘත්තිය පුහුණු අධිකාරියේ සහකාර කළමනාකරුවෙකු ලෙසට සේවය කළ 41 හැවිරිදි පුද්ගලයෙක්.
ඔහු හික්කඩුව තෙල්වත්ත ප්‍රදේශයේ පදිංචිකරුවෙක්. මෙම පුද්ගලයාගේ මරණය සම්බන්ධයෙන් පොලිස් මත්ද්‍රව්‍ය නාශක කාර්යාංශයේ උප පොලිස් පරීක්ෂකවරයෙක්, පොලිස් සැරයන්වරයෙක් ඇතුලු නිලධාරීන් 7 දෙනෙකු මෙලෙස අත්අඩංගුවට ගෙන තිබුණා.
පසුගිය ජනවාරි මස 10 වනදායි හෙරොයින් ග්‍රෑම් 15ක් සමගින් මෙම පුද්ගලයා නාරාහේන්පිට ප්‍රදේශයේදී මත්ද්‍රව්‍ය නාශක කාර්යාංශය මගින් අත්අඩංගුවට ගෙන ඇත්තේ.
ඔහුගෙන් සිදු කළ ප්‍රශ්න කිරීමේදී ඇති වූ කලහකාරී තත්වයකදී පොලිසිය එය පාලනය කිරීමට යාමේදී ඇති වූ සිද්ධියකින් පසු එම පුද්ගලයා කොළඹ ජාතික රෝහලට ඇතුලත් කෙරුණු අතර එහිදීයි මියගොස් තිබු බව සඳහන්.
සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව කළ පරීක්ෂණයකින් පසු අදාළ නිලධාරීන් 7 දෙනා මෙලෙස අත්අඩංගුවට ගෙන තිබෙනවා.
