ශ්‍රී ලංකා විදුලබල මණ්ඩලයේ විදුලි අධිකාරීවරිවරයෙකුට පහර දී රාජකාරියට බාධා කළේ යැයි සැකපිට බද්දේගම ප්‍රාදේශීය සභාවේ මන්ත්රීවරයෙක් වදුරඹ පොලීසිය විසින් අත් අඩංගුවට ගෙන තිබේ.
මෙසේ අත් අඩංගුවට ගෙන ඇත්තේ බද්දේගම ප්‍රාදේශීය සභාවේ ලේල්වල කොට්ඨාශය නියෝජනය කරන ශ්‍රි ලංකා නිදහස් පක්ෂයේ ප්‍රාදේශීය සභා මන්ත්‍රී බුද්ධික කොඩිතුවක්කු (36) නැමැති අයයි.
විදුලි රැහැන් ඇදීමකදී එයට බාධාකර තමාට සහ තවත් සේවකයින් දෙදෙනෙකුට පහර දුන්නේ යැයි ලංකා විදුලිබල මණ්ඩලයේ වදුරඹ උප කාර්යාලයේ විදුලි අධිකාරිවරයා විසින් වදුරඹ පොලීසියට කරන ලද පැමිණිල්ලකට අනුව සැකකරු අත් අඩංගුවට ගෙන තිබේ.
සැකකරු මන්ත්‍රීවරයා පහර දුන් බව කියන ලංකා විදුලිබල මණ්ඩලයේ වදුරඹ උප කාර්යාලයේ සේවකයින් දෙදෙනෙකු මේ වන විට ප්‍රතිකාර සදහා රෝහල්ගත කර තිබෙන බවද වදුරඹ පොලීසිය කියයි. ප්‍රාදේශීය සභා මන්ත්‍රීවරයාගේ නිවස අසලින් විදුලි රැහැන් ඇදීමේ දී ඔහු විසින් එයට බාධා කිරීමේදී ඇති වූ කතා බහක් බහින් බස් වීමක් දක්වා දුරදිග ගොස් මෙම පහර දීම සිදුව තිබෙන බව වදුරඹ පොලීසිය විසින් මෙතෙක් කරන ලද පොලිස් පරීක්ෂණ වලදී තහවුරු වූයේ යැයි වදුරඹ පොලීසිය කියයි.
සිද්ධිය සම්බන්ධයෙන් දෙපාර්ශවයෙන්ම ප්‍රකාශ සටහන්කරගෙන තව දුරටත් විමර්ශණ සිදුකරන බවද වදුරඹ පොලීසියේ ප්‍රකාශකයෙක් සදහන් කළේය. ඊට අදාලට විදුලි රැහැන් ඇදීම සිදුකරන ලද ස්ථානය අවට පිරිස් වෙතින්ද විමසීම් කිරීමට බලාරොත්තු වන බවත් සිදුවීමේ සැබෑ තත්ත්වය අවබෝධ කර ගැනීමට ඉදිරි විමර්ශණ වලදී හැකි වනු ඇතැයි විශ්වාස කරන බවත් වදුරඹ පොලීසිය කියයි.
වදුරඹ පොලීස් ස්ථානාධිපති පොලිස් පරීක්ෂක රුක්මන් කුමාර මහතාගේ මෙහෙයවීම මත අපරාධ අංශයේ ස්තානාධිපති උප පොලිස් පරීක්ෂක ආනන්ද ඇතුළු පිරිසක් වැඩිදුර පරීක්ෂණ පවත්වයි.
– ජයකාන්ත ලියනගේ
