ගෝඨා ගෝ ගම ප්රහාරයට සම්බන්ධ ප්රධාන සැකකරුවන් අත්අඩංගුවට නොගෙන, ප්රහාරයෙන් පසු ඇති වූ ප්රචණ්ඩකාරී සිද්ධීන්ට සම්බන්ධ පුද්ගලයන් පමණක් අත්අඩංගුවට ගැනීමේ කිසිදු සාධාරණත්වයක් නොමැති බව එක්සත් ජාතික පක්ෂ නියෝජ්ය නායක රුවන් විජයවර්ධන මහතා පොලිස්පති සී. ඩී. වික්රමරත්න මහතාට ලිපියක් යවමින් සඳහන් කර තිබෙනවා.
ගෝඨා ගෝ ගම අරගලකරුවන් සමඟ සාකච්ඡා කරමින් විසඳුමක් සෙවීමට අගමැතිවරයා විසින් භාර දුන්නේ රුවන් විජයවර්ධන මහතාටයි.
මේ සම්බන්ධයෙන් තමාට පුළුල් වගකීමක් පවරා ඇති අතර ගෝඨා ගෝ ගමට පහරදීමට අදාල ප්රධාන සැකකරුවන් මෙතෙක් අත්අඩංගුවට නොගැනීමට හේතු මෙන්ම අදාල විමර්ශනයේ ප්රගතිය පිළිබඳව ද කඩිනමින් කරුණු හෙළි කරන ලෙස රුවන් විජයවර්ධන මහතා පොලිස්පතිවරයාගෙන් ඉල්ලා තිබෙනවා.
අරගලකරුවන්ට පහරදීමට පැමිණි හෝ පහර දුන් ප්රධාන පුද්ගලයන් කිසිවකු මේ දක්වා අත්අඩංගුවට ගෙන නොමැති බවත් එදින ඇති වූ ප්රචණ්ඩත්වයට වගකිවයුතු සැකකරුවන් ගණනාවක් නම් කරමින් කොටුව අධිකරණය හමුවේ පෞද්ගලික පැමිණිල්ලක් ද ගොනු කර තිබෙන බවත් රුවන් විජයවර්ධන මහතා සඳහන් කරනවා.
නිරායුධ අරගලකරුවන්ට පහරදීමේ සිද්ධිය සම්බන්ධයෙන් චෝදනාවට ලක්ව සිටින ජ්යෙෂ්ඨ නියෝජ්ය පොලිස්පති දේශබන්දු තෙන්නකෝන් මහතාට ද පසුගිය දිනෙක ප්රහාරයක් එල්ල වූ බව ප්රසිද්ධ කාරණයක් බවත් එම සිද්ධියට සම්බන්ධ ප්රහාරකයන් පැය කිහිපයක් ඇතුළත අත්අඩංගුවට පත්වූ අතර එම මෙහෙයුම සම්බන්ධයෙන් පොලීසියේ කාර්යක්ෂම සේවය අගය කරන බව කියන විජයවර්ධන මහතා නිරායුධ අරගලයට පහරදීමේ සිදුවීමට දින ගණනාවක් ගත වී ඇතත් ඊට සම්බන්ධ එක් අයෙකු පමණක් ඊයේ (15) උදෑසන අත්අඩංගුවට ගත්ත ද අනෙක් ප්රධාන සැකකරුවන් කිසිවෙක් මෙතෙක් අත්අඩංගුවට ගැනීමට පොලීසිය අපොහොසත් වීම අතිශය කණගාටුදායක තත්ත්වයක් බව ද සඳහන් කරයි.
