මෙවර ඉන්දීය ප්‍රිමියර් ලීග් තරගාවලියේ පන්දු යවන්නෙකු වාර්තා කළ හොඳම පන්දු යැවීම වාර්තා කිරීමට දඟ පන්දු යවන ක්‍රීඩක වනිඳු හසරංගට ඊයේ (08) හැකියාව ලැබුණා.
ඒ, රෝයල් චැලෙන්ජස් බැංගලෝර් සහ සන්රයිසස් හයිද්‍රාබාද් කණ්ඩායම් අතර පැවති තරගයේ දී හයිද්‍රාබාද් කඩුලු 05ක් දවා ගනිමින්.
ඊයේ තරගයේ දී වනිඳු සිය පන්දුවාර 04 යවා අවසන් කළේ ලකුණු 18කට ප්‍රතිවාදී කණ්ඩායමේ කඩුලු 05ක් දවාගනිමින් වන අතර ඔහු යැවූ පන්දුවාර 04 තුළ නිලකුණු පන්දු 14ක් ඇතුළත්.
මෙම සුපිරි පන්දු යැවීමත් සමඟ මෙවර IPL තරගාවලියේ වැඩිම කඩුලු ලාභීන් අතර දෙවන තැනට පැමිණෙන්නට ද වනිඳුට හැකියාව ලැබුණා.
ඒ අනුව වනිඳු මේ වනවිට තරග 12කට සහභාගී වී බිඳහෙලා ඇති කඩලු සංඛ්‍යාව 21ක්.
එම ලැයිස්තුවේ පෙරමුණ ගෙන සිටින රාජස්ථාන් රෝයස් කණ්ඩායමේ දඟ පන්දු යවන ක්‍රීඩක යුශ්වේන්ද්‍ර චාහල් තරග 11කදී කඩුලු 22ක් බිඳහෙලා තිබෙනවා.
මේ අතර වනිඳු ඊයේ දැක්වූ දක්ෂතාව අගයන්නට ශ්‍රී ලංකා කණ්ඩයමේ හිටපු පුහුණුකරු දකුණු අප්‍රිකානු ජාතික මිකී ආතර් කටයුතු කර තිබුණේ සිය නිල ට්විටර් ගිණුමට සටහනක් එක්කරමින්.
ඊයේ තරගයේ දී වනිඳු දැක්වූ දක්ෂතාවයත් සමඟ රෝයල් චැලෙන්ජර්ස් බැංගලෝර් කණ්ඩායමට ලකුණු 67ක දැවැන්ත ජයක් හිමි වුණා.
