සමෘද්ධිමත් ආර්ථිකයක් ගොඩනැගීමට නවෝත්පාදන අත්‍යවශ්‍යයි – මහ බැංකු අධිපති

සමෘද්ධිමත් ආර්ථිකයක් ගොඩනැගීම සඳහා ආර්ථිකයේ නවීකරණය සහ නවෝත්පාදනය අත්‍යවශ්‍ය බව ශ්‍රී ලංකා මහ බැංකුවේ අධිපති ආචාර්ය නන්දලාල් වීරසිංහ අවධාරණය කරනවා.

කොළඹ පැවති ශ්‍රී ලංකා ආර්ථික සංගමයේ ජාත්‍යන්තර සමුළුවට සහභාගී වෙමින් ඔහු මෙම අදහස් පළ කළා.

කෘෂිකර්මාන්තය, කර්මාන්ත සහ සේවා යන රටේ ප්‍රධාන නිෂ්පාදන අංශ තුන හරහා තරඟකාරී සහ කාර්යක්ෂම නිෂ්පාදන ක්‍රියාවලියකින් තොරව සැබෑ සමෘද්ධිය අත් කරගත නොහැකි බවයි මහ බැංකු අධිපතිවරයා අවධාරණය කර සිටියේ.

දේශීය හා ගෝලීය සැපයුම් දාම ගැඹුරින් බැඳී ඇති බවත්, උදාහරණයක් ලෙස කෘෂිකාර්මික නිෂ්පාදනයක් අගය එකතු කළ නිෂ්පාදනයක් බවට පත් කිරීම සඳහා කාර්මික හා සේවා අංශවල දායකත්වය ඉතා වැදගත් බවත් අධිපතිවරයා තවදුරටත් පෙන්වා දුන්නා.

මෙම ක්‍රියාවලිය කාර්යක්ෂම හා තරඟකාරීව කරන රටවල් සමෘද්ධිමත් වන අතර, එසේ කිරීමට අපොහොසත් වන රටවල් පසුගාමී වන බවත් ඔහු පැවසුවා.

ඒ අනුව, දේශීය හා ගෝලීය පරිමාණයෙන් ආර්ථික ක්‍රියාකාරකම් කාර්යක්ෂම හා තරඟකාරීව පවතින බව සහතික කිරීම සඳහා වඩාත්ම තීරණාත්මක සාධකය නව තාක්ෂණයන් වැළඳ ගැනීම බවයි ආචාර්ය නන්දලාල් වීරසිංහ වැඩිදුරටත් පෙන්වා දුන්නේ.