ඇල්ල – වැල්ලවාය මාර්ගයේ දරුණු ත්‍රිරෝද රථ අනතුරක් – පුද්ගලයෙක් ජීවිතක්ෂයට

ඇල්ල – වැල්ලවාය මාර්ගයේ කරදගොල්ල, නවය කණුව ප්‍රදේශයේ දී ත්‍රීරෝද රථයක් මාර්ගය හරහා පෙරලී ඊයේ රාත්‍රියේ අනතුරක් සිදුව තිබෙනවා.

අනතුර සිදු වන අවස්ථාවේ ත්‍රීරෝද රථය තුළ පුද්ගලයන් හතරදෙනෙකු ගමන් කරමින් සිට ඇති බවයි වාර්තා වන්නේ.

අනතුරින් ඔවුන් සිව්දෙනාම බරපතල තුවාල ලබා වැල්ලවාය මූලික රෝහලට ඇතුලත් කර ඇති අතර, එහිදී එක් පුද්ගලයෙක් ජීවිතක්ෂයට පත්ව තිබෙනවා.

මෙලෙස මියගොස් ඇත්තේ රත්නපුර ප්‍රදේශයේ පදිංචි වයස අවුරුදු හතළිස් දෙකක පුද්ගලයෙක්.

තුවාල ලැබූ අනෙක් තිදෙනා වැල්ලවාය මූලික රෝහලේ සිට වැඩිදුර ප්‍රතිකාර සදහා මොණරාගල දිස්ත්‍රික් මහ රෝහලට මාරු කර යවා ඇති බවයි වාර්තා වුණේ.

තුවාල ලැබූවන් වයස අවුරුදු 24, 29 සහ 34 යන වයස්වල පසුවන්නන් වන අතර, මොවුන් රත්නපුර සහ වැල්ලවාය යන ප්‍රදේශවල පදිංචිකරුවන්.

මෙම පිරිස කරදගොල්ල ප්‍රදේශයේ පැවති මංගල උත්සවයකට පැමිණ ඇති අතර, ඔවුන් රාවණා දිය ඇල්ල නැරඹීමට ගොස් නැවත පැමිණෙමින් සිටිය දී මෙම අනතුරට මුහුණ පා තිබෙනවා.

අනතුර සම්බන්ධයෙන් ඇල්ල පොලිසිය විසින් ඉදිරි විමර්ශන සිදුකරනවා.