ගල්කිස්සේ වෙඩි තැබීම සංවිධානාත්මක අපරාධකරුවන් දෙදෙනෙක් අතර පවතින ගැටුමක ප්‍රතිඵලයක්

ගල්කිස්ස, වටරප්පල පාරේ පිහිටි නිවසක අලුයම සිදුවූ වෙඩි තැබීමකින් පුද්ගලයින් දෙදෙනෙකු ජීවිතක්ෂයට පත්වුණා.

එක් අයෙකු එම ස්ථානයේදීම මිය ගොස් ඇති අතර, අනෙක් පුද්ගලයා රෝහල් ගත කිරීමෙන් අනතුරුව ජීවිතක්ෂයට පත් වූ බවයි පොලිසිය සඳහන් කළේ.

යතුරුපැදියකින් පැමිණි නාඳුනන තුවක්කුකරුවන් දෙදෙනෙකු විසින් මිලිමීටර් 09 වර්ගයේ පිස්තෝලයක් යොදාගනිමින් මෙම වෙඩි තැබීම සිදුකර ඇති බවයි අනාවරණය වුණේ.

වෙඩි තැබීමෙන් මියගිය එක් පුද්ගල්ලක් 36 හැවිරිදි වියේ පසු වූ අතර අනෙක් පුද්ගලයා 20 හැවිරිදි වියේ පසු වූ අයෙක් බවයි පොලිසිය පැවසුවේ.

දැනට ඩුබායි හි සිටින බවට සැලකෙන ‘බඩෝවිට අසංක’ සහ කොස් මල්ලි’ නමැති සංවිධානාත්මක අපරාධකරුවන් දෙදෙනෙකු අතර පවතින ගැටුමක ප්‍රතිඵලයක් ලෙස මෙම වෙඩි තැබීම සිදුව ඇති බව මූලික පොලිස් පරීක්ෂණවලදී අනාවරණය වී තිබෙනවා.

වෙඩි තැබීමෙන් ඝාතනයට ලක්වූ දෙදෙනා බඩෝවිට අසංක නැමැති සංවිධානාත්මක අපරාධකරුගේ ගෝලයින් බවයි හෙළි වී ඇත්තේ.

වෙඩි තැබීමට සම්බන්ධ සැකකරුවන් හඳුනාගෙන ඇති පොලිසිය ඔවුන් අත්අඩංගුවට ගැනීම සඳහා විශේෂ මෙහෙයුමක් ආරම්භ කර තිබෙනවා.

මෙම සිදුවීම මෙම වසරේ මුල් දින හත තුළ වාර්තා වූ දෙවන වෙඩි තැබීම වන අතර, පළමු වෙඩි තැබීම පසුගිය 04 වනදා වැලිගම, වල්ලිවෙල ප්‍රදේශයේ දී සිදුවූ අතර, එහිදී 26 හැවිරිදි පුද්ගලයෙක් ජීවිතක්ෂයට පත් වුණා.