මෙරට සෞඛ්‍ය සේවාවේ ඉදිරි කටයුතු දේශපාලන අධිකාරියේ කැමැත්තට නොව සිය අමාත්‍යාංශයේ ස්ථිර සැලසුමට අනුව සිදුවිය යුතු බව සෞඛ්‍ය අමාත්‍ය වෛද්‍ය නලින්ද ජයතිස්ස මහතා පවසනවා.
අමාත්‍යවරයා මේ බව පැවසුවේ පසුගියදා නාරාහේන්පිට ජාතික රුධිර පාරවිලයන මධ්‍යස්ථානයේ පැවති විශේෂ සමුළුවට එක්වෙමින්.
සෞඛ්‍ය සේවාවේ ගුණාත්මක පරිවර්තනයකට; ප්‍රාථමික සෞඛ්‍ය සේවාව ඉහළ නැංවීම සඳහා සම්පූර්ණ බලය යෙදවිය යුතු බවත් සෞඛ්‍ය හා ජනමාධ්‍ය අමාත්‍යවරයා මෙහිදී සඳහන් කළා.
මෙම සමුළුව පැවැත්වීමේ අරමුණ වූයේ; සෞඛ්‍ය අමාත්‍යාංශය යටතේ පාලනය වන රෝහල් සහ සෞඛ්‍ය ආයතනයවල පවතින ගැටලු හඳුනාගෙන එම ගැටලුවලට කඩිනම් විසඳුම් ලබාදීමයි.
එහිදී වැඩිදුරටත් අදහස් දැක්වු අමාත්‍යවරයා පළාත් සභා සහ මධ්‍යම ආණ්ඩුව මට්ටමෙන් ක්‍රියාත්මක සියලු ව්‍යාපෘති ඒකාබද්ධව මෙහෙය විය හැකි ව්‍යාපෘති කළමනාකරණ ඒකකයක් ස්ථාපිත කිරිමට අවධානය යොමු කරන බව ද ප්‍රකාශ කළා.
එමෙන්ම ඖෂධ සම්බන්ධ ප්‍රධාන ආයතන 04ක් ජනතාවට ගුණාත්මක සහ තත්ත්වයෙන් උසස් ඖෂධ අඛණ්ඩව සැපයීම පිළිබඳ ව වගකීම භාරගත යුතු බව ද දැනට ක්‍රියාත්මක රෝහල් කමිටු විසුරුවා හැර නව රෝහල් කමිටු පත් කිරීමට පියවර ගත යුතු බව ද පැවසූ බවයි අප වාර්තාකරු කියා සිටියේ.
පහසුකම් සහිත නවීකරණය කරන ලද විද්‍යාගාරයක් ඉදිරි වසර 05 තුළ ඉදි කිරීමට රජය සැලසුම් කර තිබෙන බව ද සෞඛ්‍ය අමාත්‍යවරයා වැඩිදුරටත් පැවසුවා.
