අමෙරිකා එක්සත් ජනපදයේ දකුණු හා මධ්‍යම ආසියානු කටයුතු පිළිබඳ කාර්යාංශයේ සහකාර රාජ්‍ය ලේකම් ඩොලන්ඩ් ලූ ඇතුළු දූත පිරිසක් කතානායක ආචාර්ය අසෝක රන්වල මහතා හමු ව තිබෙනවා.
පාර්ලිමේන්තු මහලේකම් කාර්‍යාලය නිවේදනය කළේ; ශ්‍රී ලංකාවේ සංවර්ධනය සඳහා මෙන් ම පාර්ලිමේන්තු ප්‍රජාතන්ත්‍රවාදය ශක්තිමත් කිරීමට එක්සත් ජනපදයේ සහාය ඉදිරියටත් ලබාදීමට කටයුතු කරන බවට එම ජ්‍යේෂ්ඨ දූත පිරිස එකඟ වූ බවයි.
මෙම හමුවීම දෙසැම්බර් මස 06 වැනිදා පාර්ලිමේන්තු පරිශ්‍රයේ දී සිදුවුණා.
අමෙරිකා එක්සත් ජනපද සංවර්ධන නියෝජිතායතනයේ (USAID) ආසියා කාර්යාංශයේ නියෝජ්‍ය සහකාර පරිපාලක අංජලී කෞර් (Anjali Kaur) මහත්මිය සහ එක්සත් ජනපද භාණ්ඩාගාර දෙපාර්තමේන්තුවේ ආසියානු නියෝජ්‍ය සහකාර ලේකම් රොබට් කප්‍රෝත් (Robert Kaproth) මහතා ඇතුළු ඉහළ පෙළේ
නිලධාරීන් පිරිසක් මෙම අවස්ථාවට එක් ව සිටියා.
ජනතාවගෙන් ලැබුණු ජනවරම ශ්‍රී ලංකාවේ ඉදිරි ප්‍රතිසංස්කරණ ප්‍රමුඛතා, වගවීම, විනිවිදභාවය සහ ස්ත්‍රී පුරුෂ සමාජභාවය සහිත පාලනයක් ලෙස වඩාත් සාර්ථකව ඉදිරියට ගෙනයාමට පාර්ලිමේන්තුවේ තීරණාත්මක
කාර්යභාරය පිළිබඳව මෙම හමුවේදී අවධානය යොමු වූ බවයි වාර්තා වන්නේ.
එක්සත් ජනපද ජාත්‍යන්තර සංවර්ධනය සඳහා වූ නියෝජිතායතනයේ (USAID) අනුග්‍රහය මත ශ්‍රී ලංකා පාර්ලිමේන්තුව මගින් ක්‍රියාත්මක වූ වැඩසටහන් ගණනාවක් ජනතාව සහ පාර්ලිමේන්තුව අතර සබඳතාව ඉහළ නැංවීමට ඉවහල් වූ බව පෙන්වා දුන් කතානායකවරයා ඒ පිළිබඳව සිය ස්තුතිය පළ කළා.
