රුපියල් අනූ හතර ලක්ෂ පහළොස් දහසක් වටිනා “කුෂ්” ගංජා මත්ද්‍රව්‍ය තොගයක් ගුවන් තැපැල් සේවය ඔස්සේ, ත්‍යාග පාර්සලයක් ලෙස සඳහන් කරමින් කටුනායක ගුවන් බඩු ගම්මානය වෙත එවා තිබිය දී, එම පාර්සලය රැගෙන යාමට පැමිණි පුද්ගලයෙකු ද සමග රේගු නිලධාරීන් විසින් අත්අඩංගුවට ගෙන තිබෙනවා.
අප ගුවන්තොටුපොළ වාර්තාකරු පැවසුවේ ඊයේ (02) පස්වරුවේ මෙම නීතිවිරෝධී මත්ද්‍රව්‍ය සහ සැකකාර පුද්ගලයාව වැඩිදුර විමර්ශන කටයුතු සඳහා ගුවන් තොටුපොළ පොලිස් මත්ද්‍රව්‍ය නාශක අංශයේ නිලධාරීන් වෙත භාර දී ඇති බවයි.
කැනඩාවේ සිට ඩුබායි හරහා පිළියන්දල ප්‍රදේශයේ ලිපිනයකට, මෙම පාර්සලය කටුනායක ගුවන්තොටුපොළ ගුවන් බඩු ගම්මානය වෙත ගුවන් තැපැල් සේවය ඔස්සේ සැප්තැම්බර් මස 26 වැනි දින ලැබී තිබුණා.
සැක කටයුතු පාර්සලය භාර ගැනීමට පැමිණි පුද්ගලයා ඉදිරිපිට දී රේගු නිලධාරීන් විසින් විවෘත කර පරීක්ෂා කර බැලීමේ දී , කිලෝග්‍රෑම් 01යි ග්‍රෑම් 883 ක් බර “කුෂ් ” මත්ද්‍රව්‍ය තොගය නිරීක්ෂණය වූ බවයි වාර්තා වන්නේ.
සැකකාර තැනැත්තා ජා – ඇළ , කොටුගොඩ ප්‍රදේශයේ පදිංචි 56 හැවිරිදි පුද්ගලයෙකු බවත් හෙළි ව තිබෙනවා.
සැකකරු අද (03) දින මීගමුව මහේස්ත්‍රාත් අධිකරණය වෙත ඉදිරිපත් කිරීමට නියමිතයි.
