පාර්ලිමේන්තු මන්ත්‍රී උද්දික ප්‍රේමරත්නගේ වාහනයට වෙඩි තැබීමේ රංගනය මෙහෙයවා ඇති බවට සැක කෙරෙන සහකාර පොලිස් අධිකාරී සංජීව මහානාමට අයත් දේපොළ මාස තුනක කාලයකට තහනම් කර තිබෙනවා.
අද (18) පෙරවරුවේ අදාළ නඩුව කැඳවූ අවස්ථාවේ දී කොළඹ ප්‍රධාන මහාධිකරණ විනිසුරු ආදිත්‍ය පටබැඳිගේ විසිනුයි නියෝගය කරනු ලැබුවේ.
ඒ අනුව සැකකාර සහකාර පොලිස් අධිකාරිවරයාට අයත් අධි සුඛෝපභෝගී වර්ගයේ (BMW) මෝටර් රථයක් ඇතුළු වාහන 03ක් සහ ඉඩම් දෙකක භුක්ති විඳීම මෙලෙස තහනම් කර තිබෙනවා.
සංජීව මහානාම නමැත්තා විසින් මත්ද්‍රව්‍ය ජාවාරම්කරුවන්ගේ මාර්ගයෙන් අයථා ලෙස මුදල් උපයා ගැනීමේ සිද්ධිය සම්බන්ධයෙන් විමර්ශනය කරන අල්ලස් හෝ දූෂණ විමර්ශන කොමිෂන් සභාවේ අයථා මුදල් හා දේපොළ උපයා ගැනීමේ විමර්ශන අංශය විසින් කරන ලද ඉල්ලීමක් සලකා බැලූ ප්‍රධාන මහාධිකරණ විනිසුරුවරයා ලබන දෙසැම්බර් මස 18 වැනිදා දක්වා බලපැවැත්වෙන පරිදි එකී තහනම් නියෝගය නිකුත් කර තිබෙනවා.
ඒ අනුව CDC 7199 දරණ මෝටර් රථය අංක CAA 8210 දරන මෝටර් රථය හා අංක ALL 9825 දරන ලොරි රථයත් උතුරු මැද පළාතේ අනුරාධපුර දිස්ත්‍රික්කයේ මධ්‍යම – නුවරගම් පළාත ප්‍රාදේශීය ලේකම් කොට්ඨාසයේ නුවරගම් කෝරළයේ පිහිටි අක්කර 04කට අධික ඉඩම් කොටස් සහ සමගිපුර ගම්මානයේ රජයේ ඉඩමකට මායිම්ව පිහිටි අක්කරයකට අධික ඉඩම් කොටස මෙලෙස අධිකරණය විසින් භුක්ති විඳීම හෝ පරිහරණය කිරීම තහනම් කිරීමට ලක් කෙරුණා.
