ශ්රී ලංකා යොවුන් ක්රීඩක දුනිත් වෙල්ලාලගේ පන්දුවෙන් සහ පිත්තෙන් එකලෙස දැක්වූ දක්ෂතා හේතුවෙන් කැරිබියන් ප්රිමියර් ලීග් තරගාවලියේ අද පැවති තරගය ජයගන්නට බාබඩෝස් රෝයල්ස් කණ්ඩායමට හැකියාව ලැබුණා.
සෙන්ට් කිට්ස් ඇන්ඩ් නෙවිස් පෙට්රියස් කණ්ඩායම පරාජය කළ බාබඩෝස් රෝයල්ස් ක්රීඩකයින් මෙම තරගය ජයගත්තේ කඩුලු 02කින්.
තරගයේ පළමුව පන්දුවට පහර දුන් සෙන්ට් කිට්ස් ඇන්ඩ් නෙවිස් පෙට්රියස් කණ්ඩායම නියමිත පන්දුවාර 20 තුළ කඩුලු 08ක් දැවී ලකුණු 153ක ලකුණු පුවරුවක් නිර්මාණය කළා.
සෙන්ට් කිට්ස් ඉනිමේ මුල්පෙළ පිතිකරුවන් තිදෙනාම මහීෂ් තීක්ෂණ සහ දුනිත්ගේ ගොදුරු බවට පත් වෙද්දී කඩා වැටුණු සෙන්ට් කිට්ස් ඉනිම ගොඩගැනීමේ වගකීම හදිසියේම තරගාවලියට කැඳවූ වනිඳු හසරංග භාරගත්තා.
එහිදී වනිඳු පන්දු 27ක් තුළ හතරේ පහර 05ක් සහ එක් හයේ පහරක් සමඟින් ලකුණු 40ක් රැස් කළා .
ඊට අමතරව මියිකල් ලුවී ලකුණු 30ක් සහ රයන් ජෝන් ලකුණු 29ක් සෙන්ට් කිට්ස් ඉනිමට එක් කිරීමට සමත් වුණා.
පන්දු යැවීමේ දී දුනිත් වෙල්ලාලගේ සිය පන්දුවාර 04 තුළ ලකුණු 35ක් ලබාදෙමින් කඩුලු 03ක් බිඳ දැමු අතර, මහීෂ් තීක්ෂණ සෙන්ට් කිට්ස් ඉනිමේ කඩුලු 02ක් බිඳ දැමුවා.
අනතුරුව ලකුණු 154ක ජයග්රාහී ඉලක්කයක් හඹා යෑමට බාබඩෝස් රෝයල්ස් පිතිකරුවන් පිටියට පිවිසි අතර, බාබඩෝස් ජයග්රහණයේ මාවත සකසා දුන් වෙල්ලාලගේ පන්දු 32ක් තුළ හතරේ පහර පහක් සමඟ ලකුණු 39ක් රැස් කළා.
කඩීම් ඇලයින් ලකුණු 30ක් බාබඩෝස් පිළිතුරු ඉනිමට එක් කළ අතර, අවසන් මොහොතේ බාබඩෝස් ජයග්රහණය දැවැන්ත හයේ පහරකින් තහවුරු කළ නයීම් යංග් නොදැවී ලකුණු 17ක් රැස් කිරීමට සමත් වුණා.
ඒ, අනුව ඉනිමේ තවත් එක් පන්දුවක් ඉතිරිව තිබිය දී තරගය ජයගන්නට බාබඩෝස් රෝයල්ස් කණ්ඩායමට හැකියාව ලැබුණා.
පන්දු යැවීමේ දී කයිල් මේයර්ස් කඩුලු 02ක් බිඳ දැමූ අතර, වනිඳු හසරංග, ඇන්රිච් නොර්ට්ජේ, වීරසාමි පර්මාල් සහ රයන් ජෝන් අතරේ එක් කඩුල්ල බැඟින් බෙදී ගියා.
පිත්තෙන් සහ පන්දුවෙන් එක ලෙස දස්කම් පෑ දුනිත් වෙල්ලාලගේ තරගයේ වීරයා ලෙස සම්මාන හිමිකර ගත්තා.
