2024 ජනාධිපතිවරණයට අදාළ තැපැල් ඡන්ද සලකුණු කිරීමේ ක්රියාවලියේ මූලික අදියර මේ දිනවල තැපැල් ස්ථාන හරහා නිසි අධීක්ෂණයකින් මෙන් ම දැඩි ආරක්ෂාවකින් සිදු වන බවත්, ඒ අනුව දිවයින පුරා මධ්යස්ථාන 25කට අදාළ රක්ෂිත මළු යොමු කර තිබෙන බවත්; නියෝජ්ය තැපැල්පති රාජිත කේ. රණසිංහ මහතා පවසනවා.
අද (26) පෙරවරුවේ විශේෂ මාධ්ය සාකච්ඡාවකට එක්වෙමින් ඒ මහතා සඳහන් කළේ; තැපැල් ඡන්ද පත්රිකා සලකුණු කිරීමට වන රක්ෂිත පැකැට්ටු තැපැල් මාර්ගයෙන් යවා ඇති බවත්; මෙම කටයුතු සඳහා ශ්රී ලංකා පොලිසිය, පොලිස් විශේෂ කාර්යය බලකායෙන් ද පූර්ණ සහයෝගයක් ආරක්ෂාව සම්බන්ධයෙන් ලැබී ඇති බවයි.
මෙම ක්රියාවලියේ කිසිදු අකටයුත්තක් පිළිබඳ ව මෙතෙක් තොරතුරු වාර්තා වී නොමැති බව ද නියෝජ්ය තැපැල්පතිවරයා කියා සිටියා.
තම ප්රදේශයේ තැපැල් මධ්යස්ථාන වෙත අවශ්ය පොලිස් ආරක්ෂාව ලබා ගැනීමට තැපැල් ස්ථානාධිපතිවරුන් ද දැනුම්වත් කර ඇති බව ද වාර්තා වනවා.
තැපැල් ස්ථාන මගින් තැපැල් ඡන්ද පත්රිකා භාරගැනීම් කටයුතු අවසන් වූ වහාම එම රක්ෂිත පැකට්ටු අදාළ ලිපිනයේ අඩංගු සහතික කිරීමට ද නිලධාරීන්ට බලය හිමි ව තිබෙනවා.
වැඩිම තැපැල් ඡන්ද දායකයින් සංඛ්යාවක් මෙවර කුරුණෑගල දිස්ත්රික්කයෙන් ද; ඉන් පසුව මහනුවර, ගම්පහ, අනුරාධපුර දිස්ත්රික්කයෙන් ද වාර්තා වී ඇති බවත් නියෝජ්ය තැපැල්පතිවරයා කියා සිටියා.
තැපැල් ඡන්ද සඳහා භාවිත කළ යුතු ඡන්ද පත්රිකා අඩංගු ලියාපදිංචි රක්ෂිත පැකට්ටු 712,319ක් දිවයින පුරාම දිස්ත්රික් ලේකම් කාර්යාලවලින් භාර ගැනීමට සූදනම් කර ඇති බවයි හෙතෙම වැඩිදුරටත් කියා සිටියේ.
