නීතිවිරෝධී ලෙස මෙරටට රැගෙන ආ බවට සැක කෙරෙන බීඩි කොළ කිලෝ ග්‍රෑම් 2888 ක පමණ තොගයක් සමග පුද්ගලයින් තිදෙනෙකු ශ්‍රී ලංකා නාවික හමුදා භාරයට ගෙන තිබෙනවා.
නාවික හමුදා මාධ්‍ය අංශය නිවේදනයක් නිකුත් කරමින් සඳහන් කළේ; මන්නාරමේ දී ඊයේ (08) මන්නාරම කොට්ඨාස අපරාධ විමර්ශන කාර්යාංශය හා එක්ව, වංකාලේ ප්‍රදේශයේ සිදුකළ ඒකාබද්ධ සෝදිසි මෙහෙයුමක් මගින් මෙම සැකකරුවන් අත් අඩංගුවට ගත් බවයි.
මෙම බීඩි කොළ තොගය ප්‍රවාහනය කළ කැබ් රථයක් සහ ලොරි රථයක් ද නාවික හමුදා භාරයට ගැනුණා.
අදාළ බීඩි කොළ තොගය පාර්සල් 80ක අසුරා තිබූ බවයි වාර්තා වන්නේ.
මෙම මෙහෙයුම මගින් අත්අඩංගුවට ගත් සැකකරුවන් අවුරුදු 26 ත් 30 ත් අතර වයසේ පසුවන මන්නාරම ප්‍රදේශයේ පදිංචිකරුවන් බවට හඳුනා ගන්නා ලද අතර, අත්අඩංගුවට ගත් සැකකරුවන් තිදෙනා (03), බීඩි කොළ තොගය, කැබ් රථය සහ ලොරි රථය ඉදිරි නීතිමය කටයුතු සඳහා වංකාලේ පොලිස් ස්ථානය වෙත භාරදීමට කටයුතු කෙරුණා.
