දෙපිළටම තීරණාත්මක අවසන් විස්සයි විස්ස තරගය අද – මතීෂට තරගය අහිමිවෙයි

ශ්‍රී ලංකාව සහ බංග්ලාදේශය අතර තීරණාත්මක තුන්වන සහ අවසන් විස්සයි විස්ස තරගය සිල්හෙට්හිදී අද (09) පැවැත්වෙනවා.

මෙම තරගය අද පස්වරු 3.00ට ආරම්භ වීමට නියමිතයි.

කණ්ඩායම් දෙක අතර මේ දක්වා පැවැති තරග දෙක කණ්ඩායම් දෙකම තරග 1-1ක් ලෙසින් ජයගෙන සම තත්ත්වයේ පසුවනවා.

ඒ, අනුව අද තරගයේ ජයග්‍රහණය දෙපිළටම වැදගත් වන්නේ තරගාවලියේ ශූරයින් කවුරුන් ද යන්න තීරණය කිරීම සදහායි.

මෙම තරගය එළබෙන විස්සයි විස්ස ලෝක කුසලානයට පෙර කණ්ඩායම් දෙකම ක්‍රීඩාකරන අවසන් ජාත්‍යන්තර විස්ස විස්ස තරගය වීමද විශේෂත්වයක්.

මේ අතර අද තරගය සදහා වේගපන්දු යවන ක්‍රීඩක මතීෂ පතිරණ ක්‍රීඩා නොකරන බවට වාර්තා වුණා.

ඒ, ඔහු වම් පාදයේ මස්පිඩු ආබාධයකට ලක්ව සිටීම හේතුවෙන්.

දෙරට අතර පෙරේදා පැවති දෙවන විස්සයි විස්ස තරගයේ දී මතීෂ මෙම ආබාධයට ලක්වුණා.

තරග දෙකක තහනමකින් අනතුරුව අද තරගය සදහා ශ්‍රී ලංකා නිත්‍ය විස්සයි විස්ස නායක වනිදු ක්‍රීඩා කිරීමට නියමිතයි.