මධ්‍යම කඳුකරයේ මාර්ගවල දැඩි අවදානම් සහිත ස්ථාන පනහකට වැඩි ප්‍රමාණයක් හඳුනාගෙන ඇතැයි මාර්ග සංවර්ධන අධිකාරිය පවසයි.
ඌව, මධ්‍යම හා සබරගමුව පළාත්වලින් මෙම ස්ථාන හඳුනාගෙන ඇති අතර වැඩිම අනතුරුදායක ස්ථාන ප්‍රමාණයක් වාර්තා වන්නේ මධ්‍යම පළාතෙන් බව එම අධිකාරියේ ප්‍රකාශකයෙක් සඳහන් කළේය.
අනාරක්ෂිත ස්ථානවලට ආරක්ෂක වැටවල්, බැමි ඉදිකිරීම ඇතුළු ක්‍රියාමාර්ග ගැනීම යම් යම් ප්‍රමාදයන්ට ලක්ව ඇත්තේ ජාතික ගොඩනැගිලි පර්‌යේෂණ සංවිධාන මෙම ස්ථානවලට අදාළ නිර්දේශ හා අවසර ලබානොදීමෙන් යැයිද එම ප්‍රකාශකයා සඳහන් කළේය.
ඌව පළාතේ වැඩිම අන්ත්‍රාදායක ස්ථාන සහිත මාර්ගය ඇල්ල – වැල්ලවාය මාර්ගය වන අතර එම පළාතේ අවදානම් සහිත ස්ථාන තිහක් පමණ හඳුනාගෙන ඇතැයි මාර්ග සංවර්ධන අධිකාරියේ ඌව පළාත් අධ්‍යක්ෂ ටී.කේ.එම්. ගලප්පත්ති ‘අරුණ’ට පැවැසීය.
බදුල්ල මහියංගණ මාර්ගය, පස්සර මාර්ගය, නුවරඑළිය මාර්ගය ආදී මාර්ගවල අවදානම් තත්ත්වයේ ස්ථාන කිහිපයක් හඳුනාගෙන ඇතැයිද කී අධ්‍යක්ෂවරයා එකී ස්ථානවලට ආරක්ෂිත වැට සවි කිරීම, බැමි ඉදිකිරීම, මාර්ගයට වැටී ඇති ගල් හා පස් ඉවත් කිරීම් සිදුකරමින් සිටින බවද කීවේය.
මීට අමතරව සබරගමුව පළාතේද එවන් අවදානම් ස්ථාන දහයක් හඳුනාගෙන ඇතැයිද වැඩි අවධානයක් යුතු ස්ථාන 04ක් එහි පවතින බවද කියයි.
මධ්‍යම පළාතේද මහනුවර – මහියංගණය, මහනුවර – නුවරඑළිය, කොළඹ – මහනුවර මාර්ග ඇතුළු මාර්ගවල අන්ත්‍රාදායක ස්ථාන 20ක පමණ ප්‍රමාණයක් පවතින බවද අනාවරණය වේ.
අන්ත්‍රාදායක ස්ථාන වැඩි සංඛ්‍යාවක් මහනුවර දිස්ත්‍රික්කයෙන් වාර්තා වන අතර මාතලේ හා නුවරඑළිය දිස්ත්‍රික්කවලද එවන් ස්ථාන සැලකියයුතු වශයෙන් පවති.
