පැයට කිලෝමීටර් 215ක් වේගයෙන් හමා යන හිලරි (Hilary) සුළි කුණාටුවක මෙක්සිකෝව සහ නිරිතදිග එක්සත් ජනපදය දෙසට ගමන් කරමින් පවතිනවා.
4 වන කාණ්ඩයේ කුණාටුව සෙනසුරාදා මෙක්සිකානු ප්‍රාන්තයක් වන Baja California වෙත පැමිණෙනු ඇති බවටයි අනාවැකි පළවී ඇත්තේ.
කාලගුණ අනාවැකිකරුවන් පවසන්නේ පසුව එහි වේගය අඩු වී නිවර්තන කුණාටුවක් බවට පත්වන අතර මෙමගින් දකුණු කැලිෆෝනියා ප්‍රාන්තයේ ගංවතුර තත්වයන් ද නිර්මාණය වනු ඇති බවයි.
මෙය වසර 80කට පමණ කාලයකට පසු කැලිෆෝනියාවට බලපෑ පළමු නිවර්තන කුණාටුව ලෙසටයි සැලකෙන්නේ.
කුණාටුව ගමන් ගන්නා මාර්ගයේ සිටින ජනතාවගෙන් ජනාධිපති ජෝ බයිඩ්න් ඉල්ලා සිටින්නේ පූර්වාරක්ෂක පියවර ගන්නා ලෙසට සහ නිලධාරීන්ගේ මග පෙන්වීමට සවන් දෙන ලෙසයි.
ජාතික කාලගුණ සේවය (NWS) පැවසුවේ, ඇතැම් ප්‍රදේශවලට අඟල් 3-6 (සෙ.මී. 7-15) දක්වා සහ තවත් ප්‍රදේශවලට අඟල් 10 දක්වා අධික වර්ෂාපතනයක් ඇතිවීමේ හැකියාව ඇති බවයි.
සිකුරාදා රාත්‍රිය වන විට, සුළි කුණාටුව මෙක්සිකෝවේ දකුණු මායිමේ සිට සැතපුම් 285 ක් නිරිත දෙසින් පැවතුණා.
මෙක්සිකෝවේ ඇතැම් කොටස් මේ වන විට නිවර්තන කුණාටුවක් යටතේ පවතින අතර, එහි රජය ගලවා ගැනීමේ සහ සහන කටයුතු සඳහා සහය වීමට සොල්දාදුවන් 18,000ක් සූදානම් කර තිබෙනවා.
හිලරි සුළි කුණාටුව දකුණු කැලිෆෝනියාවට ළඟා වීමට පෙර ඉරිදා සවස් කාලය වන විට නිවර්තන කුණාටුවක් දක්වා දුර්වල වනු ඇතැයි අපේක්ෂා කෙරෙනවා.
ලබන බදාදා දක්වා පවතිනු ඇතැයි අපේක්ෂිත අධික වර්ෂාපතනය නිරිතදිග එක්සත් ජනපදයේ කොටස්වලට දරුණු ගංවතුරක් ගෙන එනු ඇතැයි අපේක්ෂිතයි.
මෙම කුණාටුව හමුවේ කැලිෆෝනියාවේ පැවැත්වීමට නියමිතව තිබූ මේජර් ලීග් බේස්බෝල් තරඟ තුනක් ප්‍රමාද කර ඇති අතර ස්පේස්එක්ස් මධ්‍යම කැලිෆෝනියා වෙරළ තීරයේ සිට රොකට්ටුවක් දියත් කිරීම ද සඳුදා දක්වා ප්‍රමාද කර තිබෙනවා.
ජාතික වනෝද්‍යාන සේවය විසින් කැලිෆෝනියාවේ ජෝෂුවා ජාතික වනෝද්‍යානය සහ මොජාවේ ජාතික සංරක්‍ෂණය ද වසා දමා ඇත්තේ ගංවතුර තත්ත්වයකදී සංචාරකයන් ඇතුළු නරඹන්නන් අමුත්තන් අතරමං වීම වැළැක්වීම සඳහායි.
ඇරිසෝනා ඇතුළු කලාපය පුරා නගරවල ප්‍රාදේශීය නිලධාරීන් ගංවතුරෙන් තම දේපළ ආරක්ෂා කර ගැනීමට නිවැසියන්ට වැලි කොට්ට පිරිනමා තිබෙනවා.
සුළි කුණාටු සහ නිවර්තන කුණාටු මෙක්සිකෝවේ තරමක් සුලබ සිදුවීමක්.
නමුත් නිවර්තන කුණාටුවක් සාගරයෙන් පිටතට පැමිණ කැලිෆෝනියාවට ගොඩබිමට පැමිණීම ඉතා දුර්ලභ බවයි සැන් ඩියාගෝහි ජාතික කාලගුණ සේවය ප්‍රකාශ කළේ.
අවසන් වරට නිවර්තන කුණාටුවක් දකුණු කැලිෆෝනියාවේ ගොඩබිමට කඩා වැදුණේ 1939 දී ලෝන්ග් බීච් ප්‍රදේශයට යි.
