31 හැවිරිදි ඉංජිනේරුවෙකු සිය බිරිඳ සහ දරුවන් දෙදෙනා ඝාතනය කර ඔහු ද සියදිවි හානිකරගත් පුවතක් ඉන්දියාවේ බැංගලෝරයේ, වයිට්ෆීල්ඩ් ප්‍රදේශයෙන් වාර්තා වනවා.
ඔවුන් පදිංචිව සිටි නිවස තුළ දී තම බිරිඳ සහ දියණියන් දෙදෙනා ගෙළ සිරකර මරා දැමීමෙන් පසු වීරජුන විජේ නැමැති මෙම පුද්ගලයා ද සියදිවි නසාගෙන ඇති බව සඳහන්.
සිය සැමියා අතින් මෙලෙස ඝාතනයට ලක්ව ඇති බිරිඳ 29 හැවිරිදි වියේ පසුවන අතර, දියණියන් දෙදෙනා වයස අවුරුදු 02ක සහ මාස අටක වයස්වල පසුවනවා.
ඉකුත් ජූලි 31 වැනිදා මෙම අපරාධයන් සිදුව ඇති අතර, පොලිසිය මොවුන්ගේ සිරුරු සොයාගෙන ඇත්තේ ඊයේ (03) දිනයේ දී බවයි විදෙස් මාධ්‍ය වාර්තා කළේ.
ඝාතනයට ලක්වූ බිරිඳගේ සහෝදරයා අදාළ නිවසට ගොස් කිහිප වතාවක්ම දොරට තට්ටු කළත් කිසිවකු ප්‍රතිචාර නොදැක්වීමත් සමඟ සැකසිතී ඒ බව පොලිසියට දන්වා තිබෙනවා.
අනතුරුව පොලිසිය පැමිණ දොර කඩා නිවසට ඇතුළු වී බැලීමේ දී මෙම මළ සිරුරු හමු වූ බවයි පොලිසිය පැවසුවේ.
බිරිඳ සහ දියණියන් දෙදෙනාගේ සිරුරු නිවසේ සාලයේ තිබී සොයාගෙන ඇති අතර, ඒවායේ ගෙල සිර කළ සලකුණු ද නිරීක්ෂණය වූ බවයි පොලිසිය වැඩිදුරටත් සඳහන් කළේ.
විජය මුලින්ම ඔහුගේ බිරිඳගේ ගෙළ සිරකර පසුව දියණියන් දෙදෙනාගේ ගෙළ මිරිකා ඝාතනය කර ඇති බව මූලික විමර්ශනයේදී අනාවරණය වී තිබෙනවා.
ඔවුන් ඝාතනය කිරීමෙන් පසු ඔහු ද සිවිලිමේ විදුලි පංකාවක එල්ලී සිය ජීවිතය අවසන් කරගෙන ඇති බවයි පොලිසිය පැවසුවේ.
අදාළ පුද්ගලයා මෙම අපරාධයන් සිදුකිරීමට හේතුව මෙතෙන් අනාවරණය වී නැහැ.
