ශ්‍රී ලංකා ක්‍රිකට් නිලවරණය ලබන මැයි මස 20 වනදා පැවැත්වීමට සැලසුම් කර තිබෙනවා.
එහිදී 2023 – 2025 අතර කාලසීමාව සඳහා නව නිලධාරී මණ්ඩලයක් පත් කරගැනීමට නියමිතයි.
නිවේදනයක් නිකුත් කරමින් ශ්‍රී ලංකා ක්‍රිකට් ආයතනය සඳහන් කළේ, මෙවර නිලවරණය සඳහා ත්‍රිපුද්ගල නිලවරණ කමිටුව විසින් නාමයෝජනා භාරගත් බවයි.
පසුගිය 2022 වසරේ නොවැම්බර් මස 23 වනදා පැවති ශ්‍රී ලංකා ක්‍රිකට් විධායක කමිටු රැස්වීමේදී ක්‍රිකට් නිලවරණ කමිටුව සඳහා සාමාජිකයින් පත්කරනු ලැබූ බව ද එහි සඳහන්.
විශ්‍රාමලත් අභියාචනාධිකරණ විනිසුරු මාලනී ගුණරත්න, විශ්‍රාමලත් මහාධිකරණ විනිසුරු ශිරෝමි පෙරේරා, ශ්‍රී ලංකා පරිපාලන සේවයේ විශ්‍රාමික ජ්‍යෙෂ්ඨ රාජ්‍ය නිලධාරියෙකු වන සුනිල් සිරිසේන මෙම ත්‍රිපුද්ගල නිලවරණ කමිටුවට ඇතුළත්.
නාමයෝජනා භාර ගැනීම ඊයේ උදෑසන 9.30ට ආරම්භ වූ අතර පස්වරු 3.30ට අවසන් කෙරුණා.
