ජනාධිපති රනිල් වික්‍රමසිංහ විසින් ලබන 08 වනදා ඉදිරිපත් කරනු ලබන ආණ්ඩුවේ ප්‍රතිපත්ති ප්‍රකාශය පිළිබඳ සභාව කල් තැබීමේ විවාදය ලබන 09 වනදා සහ 10 වනදා පැවැත්වීමට තීරණය වී තිබෙනවා.
කථානායක මහින්ද යාපා අබේවර්ධනගේ ප්‍රධානත්වයෙන් ඊයේ (03) පැවති පක්ෂ නායක රැස්වීමේදී මෙම තීරණය ගෙන ඇති බවයි වාර්තා වුණේ.
ලබන 09 වනදා පෙරවරු 9.30ට පාර්ලිමේන්තුව රැස්වන අතර, සුබසාධක ප්‍රතිලාභ පනත යටතේ නියෝග සහ විවිධ රජයේ ව්‍යවස්ථාපිත ආයතනවල වාර්ෂික වාර්තාවලට අදාළව පසුගිය සභාවාරයේ දී පාර්ලිමේන්තුවට යථා පරිදි ඉදිරිපත්කර තිබූ යෝජනා 51ක් අනුමතිය සදහා මෙහිදී ඉදිරිපත් කිරීමට නියමිතයි.
අනතුරුව ජනාධිපතිවරයා විසින් ඉදිරිපත් කරනු ලබන ආණ්ඩුවේ ප්‍රතිපත්ති ප්‍රකාශය පිළිබඳ සභාව කල් තැබීමේ විවාදය පස්වරු 5.00 දක්වා පැවැත් වීමටයි තීරණය කර ඇත්තේ.
පෙබරවාරි 10 වනදා පෙරවරු 9.30 සිට පස්වරු 5.00 දක්වා ආණ්ඩුවේ ප්‍රතිපත්ති ප්‍රකාශය පිළිබඳ සභාව කල් තැබීමේ විවාදය දෙවන දිනටත් පැවැත්වීමට නියමිතයි.
