ඓතිහාසික මිහින්තලා පුදබිමෙහි ආරක්ෂාව සහ සංවර්ධනය වෙනුවෙන් යොදවා ඇති ත්‍රිවිධ හමුදාව ඉවත් කිරීමට කටයුතු කිරීම බෞද්ධාගම නොසලකා හැරීමක් බව විහාරාධිපති පූජ්‍ය වලවාහැංගුනවැවේ ධම්මරතන නායක හිමියන් පවසනවා.
උන්වහන්සේ පෙන්වා දෙන්නේ මෙරට බුද්ධාගම ආරම්භ වූ මිහින්තලය පුදබිම රජය විසින් නොසලකා හැරීමට කටයුතු කරනු ලබන්නේ ජාත්‍යන්තර කුමන්ත්‍රණයක් ද නැතිනම් රටේ ජනතාව වෙනුවෙන් ආණ්ඩුවට විරුද්ධව සිදු කළ ප්‍රකාශ නිසා ද යන්න ජනතාවට ප්‍රසිද්ධ ප්‍රකාශයක් සිදු කරන ලෙස වගකිවයුත්තන්ගෙන් ඉල්ලා සිටින බවයි.
අද මිහින්තලා පුදබිමේ දී මාධ්‍ය වෙත අදහස් පළ කරමින් නායක කියා සිටියේ මේ වන විට ධාතු මන්දිරය ඇතුළු ගොඩනැගිලි සංවර්ධනය නාවික හමුදාව, යුධ හමුදාව හා සිවිල් ආරක්ෂක දෙපාර්තමේන්තුවේ සෙබළුන් විසින් සිදුකරමින් පවතින මොහොතක එම කටයුතුවලින් එම ආරක්ෂක අංශ ඉවත් කිරීම තුලින් රජය සිදුකරනුයේ බෞද්ධ ආගම නොසලකා හැරීමක් බව ද නායක හිමියන් පවසනවා.
මිහින්තලා පුද බිමෙහි යොදවා ඇති ආරක්ෂක අංශ ඉවත් කිරීම සම්බන්ධයෙන් සහ ඊට නියෝග ලබා දුන් පුද්ගලයන් කවුද යන්න සහ මේ සම්බන්ධයෙන් ලිඛිතව දැනුම්දීමක් සිදු කරන ලෙසත් වගකිවයුත්තන්ගෙන් ඉල්ලා සිටින බවයි නායක හිමියන් කියාසිටියේ.
ඓතිහාසික මිහින්තලා පුදබිමේ ඉදිකිරීම් ක්ෂේත්‍රය සඳහා යොදවා තිබුණේ යුද හා නාවික හමුදාව ඇතුළු සිවිල් ආරක්ෂක දෙපාර්තමේන්තුවේ සාමාජිකයන් පිරිසක්.
කිසිදු දැනුම් දැනුම් දීමකින් තොරව මෙම සෙබළුන් ඉවත් කිරීම පිළිබඳව ඓතිහාසික මිහින්තලා රජ මහා විහාරස්ථානයේ ආරක්ෂාව පිළිබඳව පැන නැගෙනුයේ විශාල ගැටළුවක් බවයි නා හිමියන් අවධාරණය කරන්නේ.
මිහින්තලා පුද බිමේ පිහිටි ධාතු මන්දිරයේ ඉදිරි දොරටුව ගලවා ඉවත් කිරීමෙන් පසු,එහි සේවය කළ සෙබළුන් ඉවත් වීම නිසා මහ රහතන් වහන්සේලාගේ ධාතුන්, භෂ්මාවශේෂ, රනින් නිම කරන ලද සතර වරම් දෙවියන්ගේ ප්‍රතිමා, පෙරදා මිහිඳු මහරහතන් වහන්සේ පුද පූජා පැවැත් වූ ස්වර්ණමය බුද්ධ ප්‍රතිමාව, කිලෝ සියයකට අධික බරකින් යුත් පස් ලෝ ප්‍රතිමා කිහිපයකද ආරක්ෂාව නැති වී ඇති බව නා හිමියන් පෙන්වා දෙනවා.
