ඉදිරි පළාත් පාලන මැතිවරණයට අදාළ කිසිදු ප්‍රචාරක කටයුත්තකට තමන් සම්බන්ධ නොවන බව ජනාධිපති රනිල් වික්‍රමසිංහ මහතා එක්සත් ජාතික පක්ෂයට දැනුම් දී තිබෙනවා.
මන්ට වරසක් ලැබී ඇත්තේ ඡන්දය පැවැත්වීමට නොව වසර දෙකක් ඇතුළත රට වැටී තිබෙන ආගාධයෙන් ගොඩ ගැනීමට බව සඳහන් කළ ජනාධිපතිවරයා පෙන්වා දෙන්නේ එම වරමින් පිට ක්‍රියා කිරීමට කිසි විටකත් සූදානම් නොමැති බවයි.
ජනාධිපති රනිල් වික්‍රමසිංහ මෙම කරුණු දැනුම්දී ඇත්තේ එක්සත් ජාතික පක්ෂයේ ජ්‍යෙෂ්ඨ නායකයන් කොළඹදී හමුවූ අවස්ථාවේදීයි.
එක්සත් ජාතික පක්ෂයට පළාත් පාලන මැතිවරණයට ඉදිරිපත් විය යුතුව තිබේ නම් ඒ සඳහා වන තීරණය ගැනෙන කෘත්‍යාධිකාරී මණ්ඩල රැස්වීමේ මුලසුන සාම්ප්‍රදායානුකූලව පමණක් ගැනීමට තමන් ඉදිරිපත් වන බවයි රනිල් වික්‍රමසිංහ මහතා එක්සත් ජාතික පක්ෂ නායකයන්ට දැනුම්දී ඇත්තේ.
ඊට අමතරව පළාත් පාලන මැතිවරණයට අදාළ කිසිදු කටයුත්තකට තමන් සහභාගී නොවන බව ද ඔහු අවධාරණය කළා.
එක්සත් ජාතික පක්ෂය පළාත් පාලන මැතිවරණයට සහභාගී වන්නේ නම් අපේක්ෂක ලැයිස්තුවෙන් සියයට 40ක් නව මුහුණු දැමීම සුදුසු බවට තම මතය වන බවයි ජනාධිපතිවරයා පෙන්වාදී ඇත්තේ.
මහ නගර සභා සහ ප්‍රාදේශීය සභා ඇතුලත් පළාත් පාලන ආයතන සඳහා පත්වන සභිකයන් හාර දහසකට පමණක් පඩි සහ දීමනා වෙනුවෙන් මුදල් වෙන්කර ඇති අතර ඉතිරි පිරිස පඩි සහ දීමනා රහිතව නොමිලේ සේවය කරන බවට දැනුම්දිය යුතුව ඇතැයි ද ජනධිපතිවරයා ප්‍රකාශකර තිබෙනවා.
