තමන් පැහැරගත් බව පවසමින් සැමියා හා දරුවන් රවටමින් රුපියල් ලක්ෂ 35ක මුදලක් ලබා ගැනීමට තැත් කිරීම් දී අත්අඩංගුවට ගැනුණු කාන්තාව අද (19) දිනයේ අධිකරණය වෙත ඉදිරිපත්කර තිබෙනවා.
ඒ, අනුව සැකකාර කාන්තාව ආණමඩුව මහේස්ත්රාත් අධිකරණය වෙත ඉදිරිපත් කළ බවයි අප කළ විමසීමක දී ආණමඩුව පොලිසිය පැවසුවේ.
අදාළ කාන්තාව විසින් ලබාගෙන තිබූ රුපියල් ලක්ෂ 7.5ක ණය මුදලක් පියවීම සඳහා ඇය විසින් මෙලෙස උපක්රමශීලිව තම සැමියාගෙන් මුදල් ලබා ගැනීමට උත්සාහ කර ඇති බව සිදුකළ විමර්ශන වලදී අනාවරණය කරගෙන තිබෙනවා.
තමන් පැහැරගත් බව පවසා එම කාන්තාව සිය සැමියාගෙන් මුලදී රුපියල් ලක්ෂ 50ක මුදලක් ලබා ගැනීමට උත්සහ කර ඇති අතර, පසුව එම ගණන ඇය විසින් රුපියල් ලක්ෂ 35ක් දක්වා අඩුකර ඇති බවයි දැනගන්නට ලැබුණේ.
50 හැවිරිදි වියේ පසුවන තිදරු මවක් වන මෙම කාන්තාව පසුගිය 15 වනදා ආණමඩුව ප්රදේශයේ පිහිටි සිය නිවසින්, දියණිය පදිංචි වාරියපොල – හංහමුණ ප්රදේශයට ගොස් ඇති බවත්, එදින ආණමඩුව නගරයට පැමිණෙන බව සැමියාට දුරකථන ඇමතුමක් ලබා දී පවසා ඇති බවට ප්රකාශ කර තිබුණා.
කෙසේ වෙතත් අදාළ කාන්තාව එදින සවස සිට අතුරුදහන්ව ඇති බවට හෙළිව ඇති අතර, ඒ අනුව මේ සම්බන්ධයෙන් ඇයගේ බාල පුතු විසින් පොලිසියට පැමිණිල්ලක් සිදුකර ඇති බව සඳහන්.
පැමිණිල්ලට අනුව සිදුකළ මෙහෙයුම් වලදී මෙම කාන්තාව වෙනත් නිවසක සැඟව සිටිය දී සොයා ගැනීමට පොලිසියට හැකිව තිබෙනවා.
මෙම කාන්තාව ගමන් කළ ස්ථාන හා අදාළ මාර්ගවල ආවේක්ෂණ කැමරා පරීක්ෂා කරමින් ආණමඩුව පොලිසිය විසින් අදාළ පරීක්ෂණ කටයුතු සිදුකර ඇති බවයි දැන ගන්නට ලැබුණේ.
සැකකාර කාන්තාව අත්අඩංගුවට ගැනීමෙන් අනතුරුව ඇය විසින් සිදුකළ වංචාව පොලිසිය හමුවේ පාපොච්චාරණය කර ඇති බවයි වාර්තා වුණේ.
