34 වසරකට පසුව අධි ආරක්ෂිත කලාපයක් ලෙස නම්කර තිබූ යාපනය – පලාලි මාර්ගය මහජනතාවට විවෘත කර තිබෙනවා.
අප වාර්තාකරු පැවසුවේ පැවති කුරිරු එල්ටීටීඊ යුද්ධ හේතුවෙන් මෙම කලාපය අධිආරක්ෂිත කලාපයක් ලෙස නම් කර තිබූ බවයි.
පලාලි – පේදුරුතුඩුව මංසන්ධිය දක්වා වූ මාර්ගය අද (10) දින පෙරවරුවේ සිට සාමාන්‍ය ජනතාවගේ ගමනාගමනය වෙනුවෙන් යුද හමුදාව විසින් විවෘත කරනු ලැබුවා.
මේ අනුව යාපනය – පලාලි ප්‍රධාන මාර්ගයේ පිහිටි වාසවිලාන් මංසන්ධියේ සිට පේදුරුතුඩුව පොන්නාලෙයි දක්වා ඇති කිලෝමීටර් දෙකහමාරක දුර මාර්ගය අද උදෑසන සිට ගමනාගමනය සඳහා විවෘත කිරීමට පලාලි යුදහමුදා කඳවුර විසින් පියවර ගත්තා.
කෙසේ වෙතත් විවෘත කරන ලද මාර්ගයේ ගමන් කරන මගීන්ට පිළිපැඳිය යුතු කොන්දේසි 07ක් යුද හමුදාව විසින් දැනුම්දී ඇති අතර ඒ අනුව, මාර්ගය විවෘතව පවතින්නේ උදෑසන 06 සිට සවස 5 දක්වා කාලය අතර වනු ඇති.
විවෘත කරන මාර්ගයේ අතරමග වාහන නවතා තැබීම තහනම් කිරීම, මාර්ගයේ ගමන්කරන අතරතුර මග දෙපස ඡායාරූප වීඩියෝ ගැනීම තහනම් කිරීම, අදාළ මාර්ගය දෙපස ඇවිදීම තහනම් කිරීම, මගී ගමනාගමනය හැර වෙනත් කටයුතු සඳහා මාර්ගය භාවිත නොකිරීම, මාර්ගයේ ගමන් කරන වාහනවල උපරිම වේගය පැයට කිලෝමීටර් 40ක් වීම සහ මාර්ගයේ ගමන් කරන අයගේ අනන්‍යතාව ගැන ආරක්ෂක අංශ දැනුවත් කිරීම යනාදි කරුණු වනවා.
