2030 වනවිට එළවළු බීජ ආනයනය සම්පූර්ණයෙන්ම නතර කිරීම සඳහා අවශ්‍ය බීජ නිෂ්පාදනය කිරීමේ වැඩ පිළිවෙළක් ඇරඹු බව කෘෂිකර්ම අමාත්‍යාංශය පවසනවා.
කෘෂිකර්ම අමාත්‍ය මහින්ද අමරවීර සඳහන් කරන්නේ මේ වනවිට කෘෂිකර්ම දෙපාර්තමේන්තුව විසින් දේශීය එළවළු බීජ නිෂ්පාදනය අරඹා ඇති බවයි.
එළවළු බීජ අවශ්‍යතාවයෙන් පතෝල සියයට 100ක්, මෑකරල් සියයට 93ක්, කරවිල සියයට 89ක්, වම්බටු සියයට 79ක්, බෝංචි සියයට 64ක්, බණ්ඩක්කා සියයට 61ක්, මාළු මිරිස් සියයට 44ක්, තක්කාලි සියයට 27ක්, රාබු සියයට 39ක් වශයෙන් බීජ නිෂ්පාදනය ආරම්භ කර ඇති බවයි වාර්තා වන්නේ.
මෙරට එළවළු බීජ අවශ්‍යතාවය කිලෝ ග්‍රෑම් 800,000ක් පමණ වන අතර, ඉන් උඩරට එළවළු සඳහා කිලෝ ග්‍රෑම් 100,000ක් ද පහතරට එළවළු සඳහා කිලෝ ග්‍රෑම් 700,000 ක්ද ලෙස බීජ අවශ්‍යතාවය පවතිනවා.
මෙම බීජ අවශ්‍යතාවය දේශීය බීජ නිෂ්පාදනයෙන් සහ අනායනික බීජ මඟින් සපයා ගනු ලබනවා.
මේ අතර 2023 වසර තුළ මෙරටට සහල්, මුං ඇට, උඳු, කුරක්කන්, කව්පි සහ රටකජු ආනයනය කිරීමේ අවශ්‍යතාවයක් නොමැති බව කෘෂිකර්ම දෙපාර්තමේන්තුව සඳහන් කර සිටියා.
