කෘෂිකාර්මික හා ගොවිජන රක්ෂණ මණ්ඩලය විසින් මේ වනවිට දිවයින පුරා පවතින නියඟය හේතුවෙන් වී වගාවට සිදුව ඇති වගා හානි තක්සේරු කිරීම ආරම්භ කර තිබෙනවා.
ඒ අනුව දෛනික වී වගා හානි පිළිබඳ වාර්තාවක් කෘෂිකර්ම අමාත්‍ය මහින්ද අමරවීරට භාර දීම සිදු වනවා.
සමස්ත දිවයිනම ආවරණය වන පරිදි සිදු කෙරෙන මෙම වී වගා හානි තක්සේරු කිරීමේ කටයුතු සඳහා කණ්ඩායම් 25ක් යොදවා ඇති අතර උඩවළව කලාපයේ හානි තක්සේරුව සඳහා විශේෂ කණ්ඩායමක් ප්‍රධාන කාර්යාලයෙන් යොදවා ඇති බවයි එම මණ්ඩලයේ සභාපති ඩබ්. එම්. එම්.බී වීරසේකර මහතා කියාසිටියේ.
ඊයේ දිනයට වනවිට වාර්තා වී ඇති වගා හානි තක්සේරු කිරීම් පිළිබඳ වාර්තාව අද පෙරවරුවේ කෘෂිකර්ම අමාත්‍ය මහින්ද අමරවීරට භාරදී තිබෙනවා.
ඒ අනුව ඊයේ දිනය වනවිටත් වැඩිම වගා හානි වාර්තා වී තිබෙන්නේ කුරුණෑගල දිස්ත්‍රික්කයෙන්. එම ප්‍රමාණය අක්කර 19,388ක්. අගතියට පත්ව ඇති ගොවීන් ප්‍රමාණය 22,357ක් බවයි එහි දැක්වෙන්නේ.
දෙවන ස්ථානයට වැඩිම වගා හානි ප්‍රමාණයක් උඩවළව කලාපයෙන් වාර්තා වනවා. එය අක්කර 10,125ක් වන අතර පීඩාවට පත්වූ ගොවීන් ප්‍රමාණය 4050ක්.
ඊයේ දිනය වනවිට දිවයින පුරා වාර්තා වන සමස්ත වී වගා හානි අක්කර ප්‍රමාණය 37,101ක් වන අතර ගොවීන් ප්‍රමාණය 32,967ක්.
දිස්ත්‍රික්කය ගොවීන් ප්‍රමාණය අක්කර ගණන
කොළඹ 30 80
ගම්පහ 199 193
කලුතර 133 123
මාතලේ 181 211
නුවරඑළිය 489 491
ගාල්ල 138 161
මාතර 789 629
හම්බන්තොට 604 541
මන්නාරම 09 07
වව්නියාව 268 352
මුලතිව් 10 21
මඩකලපුව 242 528
අම්පාර 209 482
ත්‍රිකුණාමලය 168 374
පුත්තලම 550 818
මහව 9333 8008
අනුරාධපුර 292 336
පොලොන්නරුව 89 189
මොණරාගල 331 371
රත්නපුර 635 636
කෑගල්ල 587 184
තඹුත්තේගම 267 276
මනම්පිටිය 162 218
දෙහිඅත්තකණ්ඩිය 217 353
මෙහි අවසන් වාර්තාව සකස් කිරීම සඳහා මාසයක පමණ කාලයක් ගතවනු ඇතැයි ද ගොවිජන රක්ෂණ මණ්ඩලය සඳහන් කළා.
මෙම වගා හානි සම්බන්ධව අමාත්‍ය මණ්ඩලය දැනුම්වත් කිරීම සඳහා අමාත්‍ය මණ්ඩල පත්‍රිකාවක් සකසන ලෙස ද කෘෂිකර්ම අමාත්‍ය මහින්ද අමරවීර මහතා කෘෂිකර්ම ලේකම්වරයාට උපදෙස් දී තිබෙනවා.
එම අමාත්‍ය මණ්ඩල පත්‍රිකාව ලබන සතියේ අමාත්‍ය මණ්ඩලයට ඉදිරිපත් කිරීමට කටයුතු කරන බවයි අමාත්‍ය මහින්ද අමරවීර මහතා සඳහන් කළේ.
