හෝමාගම ප්‍රදේශයේ සුඛෝභෝගී නිවාස සංකීර්ණයක නිවසක් තුළ මත් සාදයක් පවත්වමින් සිටිය දී අත්අඩංගුවට ගැනුණු තරුණ තරුණියන් 27 දෙනාගෙන් පිරිසක් කැස්බෑව මහේස්ත්‍රාත් අධිකරණය වෙත ඉදිරිපත් කර තිබෙනවා.
මෙලෙස අධිකරණයට ඉදිරිපත් කර ඇත්තේ මත්ද්‍රව්‍ය සන්තකයේ තබාගෙන සිටි තරුණයන් පස්දෙනෙකු සහ සාදයේ දී ගණිකා සේවය සැපයීමට පැමිණ සිටි තරුණියන් තිදෙනෙක්.
මෙලෙස අධිකරණය හමුවට ඉදිරිපත් කළ සැකකරුවන් සහ සැකකාරියන්ගෙන් හයදෙනෙක් ලබන 14 වනදා දක්වා රිමාන්ඩ් භාරයේ තබන ලෙසයි මහේස්ත්‍රාත්වරිය නියෝග කර ඇත්තේ.
අධිකරණය විසින් ඇප නියමකර ඇත්තේ හෑෂ් මත්ද්‍රව්‍ය සන්තකයේ තබාගෙන සිටි තරුණයින් දෙදෙනෙකුටයි.
මේ අතර ගණිකා සේවය සැපයීමට පැමිණ සිටි කාන්තාවන්ගේ සමාජ රෝග වාර්තාවක් ද ලබන 14 වනදාට අධිකරණය හමුවට ඉදිරිපත් කරන ලෙස ද මහේස්ත්‍රාත්වරිය නියෝග කර තිබෙනවා.
හෝමාගම ප්‍රදේශයේ සුඛෝභෝගි නිවාස සංකීර්ණය නිවසක් කුලී පදනම මත ලබාගෙන තරුණ තරුණියන් පිරිසක් පසුගිය 08 වනදා මත්ද්‍රව්‍ය සාදයක් පවත්වන බවට කහතුඩුව පොලීසියට ලැබුණු තොරතුරක් මත මෙම වැටලීම සිදු කර තිබුණා.
එහිදී පෞද්ගලික සරසවියක සිසු සිසුවියන් 17 ඇතුළු 27 දෙනෙක් පොලිසිය මගින් අත්අඩංගුවට ගත බවයි වාර්තා වුණේ.
අනතුරුව මත්ද්‍රව්‍ය සන්තකයේ තබා ගත් තරුණයන් සහ ගණිකා සේවය සැපයීමට පැමිණ සිටි තරුණියන් හැර අනෙකුත් තරුණ තරුණියන් 19 දෙනා පොලිස් ඇප මත මුදාහැරීමට කටයුතු කළා.
