2004 වර්ෂයේ ඔක්තෝබර් මස 09 වැනි දින හා දෙසැම්බර් 01 වැනි දින අතර කාලයේ දී තමන් ශ්‍රී ලාංකික අනන්‍යතාවක් ඇති පුරවැසියෙකු නොවන බව දැන දැනත් සිය නම ඩයනා ගමගේ ලෙස නිත්‍යනුකූල ව සංශෝධනය නොකර තිබියදී; කූඨ ලේඛන ඉදිරිපත් කර ජාතික හැඳුනුම්පතක් ලබා ගැනීමට උත්සාහ කර පුද්ගලයින් ලියාපදිංචි කිරීමේ දෙපාර්තමේන්තුවේ ජනරාල්වරයා ඇතුළු නිලධාරීන් වංචනික ලෙස රැවටීම ඇතුළු චෝදනා ත්‍රිත්ත්වයකට එරෙහිව නඩු පවරා ඇති හිටපු රාජ්‍ය අමාත්‍ය ඩයනා ගමගේට අදාළ නීතිපති විසින් පවරන ලද නඩුවේ පූර්ණ නඩු විභාගය යළි කැඳවීමට දින නියම කර තිබෙනවා.
දසත අධිකරණ වාර්තාකරු පැවසුවේ; එම පූර්ණ නඩු විභාගය මෙම වසරේ නොවැම්බර් මස 04 වැනි දින කැඳවන ලෙසට අද (04) කොළඹ මහාධිකරන විනිසුරු මංජුල තිලකරත්න මහතා නියෝග කළ බවයි.
පැමිණිල්ල විසින් අධිකරණය හමුවේ චෝදනා ගොනු කරන ලද විත්තිකාරියට එරෙහිව ඇති චෝදනා සනාථ කිරීමට අදාළ සියලු ලිපි විවෘත අධිකරණය හමුවේ නඩු වාරයේ දී ඉදිරිපත් කරන ලෙසට ද මහාධිකරණ රෙජිස්ට්‍රාර්වරිය වෙත නියෝග කළා.
එම නඩු කටයුත්තට අදාළ ව විත්තිකාර පාර්ශ්වයට එරෙහිව කොළඹ ප්‍රධාන මහේස්ත්‍රාත් අධිකරණය වෙත ගොනුකර ඇති සියලු ලේඛන තම අධිකරණය වෙත ඉදිරිපත් කිරීමට ද විනිසුරුවරයා සතියක් කාලයක් හිමිගැන්වූවා.
අධිකරණය විසින් නිකුත් කළ නියෝග නිසියාකාරව ක්‍රියාත්මක වන්නේ දැයි අධීක්ෂණය කරන ලෙසට ද නීතිපතිවරයා වෙනුවෙන් පෙනී සිටින රජයේ අධිනීතිඥවරියට නියෝග කෙරුණා.
මේ වනවිට අධිකරණ සාක්ෂි ලේඛන අතරින් තමන් වෙත විත්තිකාර පාර්ශ්වය ලබා දී ඇත්තේ සීමිත ලේඛන සංඛ්‍යාවක් බවටයි විත්තිකාරිය වෙනුවෙන් පෙනී සිටින ජනාධිපති නීතිඥ චානක රණසිංහ සිය ප්‍රතිවිරෝධය ඉදිරිපත් කළේ.
එය සලකා බලමින් අධිකරණය විසින් ඉහත නියෝගය නිකුත් කරන ලද අතර චෝදනා සනාථ කිරීමට තවත් සාක්ෂිකරුවෙකුගේ නමක් ඇතුළත් කර සංශෝධනය කර ඉදිරිපත් කරන ලෙසට ද නියෝග කෙරුණා.
