බෙංගාල බොක්ක මුහුදු ප්‍රදේශයේ සුළඟේ සංසරණය තීව්‍ර වීම හේතුවෙන් සුළි කුණාටුවක ලක්ෂණ ඇති විය හැකි බව යාපනය විශ්වවිද්‍යාලයේ භූගෝල විද්‍යා අංශාධිපති සහ සහතිකලත් කාලගුණ විද්‍යාඥ කලනිධි නාගමුත්තු ප්‍රදීපරාජා මහතා පවසනවා.
හෙට (07) දිනයේ දී මෙම කැලඹීම ඇති විය හැකි බවයි ප්‍රදීපරාජා මහතා අනතුරු අඟවා ඇත්තේ.
මෙම අනතුරු ඇඟවීම ඊයේ (05) දිනයේ දී කාලගුණ විද්‍යා දෙපාර්තමේන්තු අධ්‍යක්ෂ ජනරාල් අතුල කරුණානායක මහතා විසින් ද සිදු කරනු ලැබුවා.
උතුරු සහ නැගෙනහිර පළාත්වල මේ හේතුවෙන් වැසි වාර කිහිපයක් ඇති විය හැකි බවත් සඳහන්.
බස්නාහිර, සබරගමුව සහ දකුණු පළාත්වලත්, නුවරඑළිය සහ මහනුවර දිස්ත්‍රික්කවලත් සවස් කාලයේ හෝ රාත්‍රී කාලයේ තැනින් තැන වැසි හෝ ගිගුරුම් සහිත වැසි ඇතිවීමේ ප්‍රවණාත්වක් ද පවතිනවා.
සෙසු ප්‍රදේශවල ද ප්‍රධාන වශයෙන් වැසි රහිත කාලගුණ තත්ත්වයක් බලාපොරොත්තු විය හැකියි.
දිවයිනේ බොහෝ ප්‍රදේශවල උදෑසන කාලයේ දී මීදුම් සහිත තත්ත්වයක් පැවතිය හැකි අතර ගිගුරුම් සහිත
වැසි සමග ඇතිවිය හැකි තාවකාලික තද සුළංවලින් සහ අකුණු මගින් සිදු වන අනතුරුවලින් ආරක්ෂා වීමට කටයුතු කරන ලෙසත් කාලගුණ විද්‍යා දෙපාර්තමේන්තුව ඉල්ලා සිටිනවා.
