නයිජීරියාවේ Ogun ප්රාන්තයේ හූනෙකු වැටී සිටි ආහාරයක් අනුභව කළ එකම පවුලේ හය දෙනෙකු මියගොස් ඇතැයි විදෙස් මාධ්ය පවසනවා.
වරලත් ගණකාධිකාරීවරයෙකු වන ඇඩෙල්ක් ජෝන් සැමුවෙල්, ඔහුගේ බිරිඳ, පමෙලා ඇඩෙල්කේ, ඔවුන්ගේ දරුවන් දෙදෙනා සහ තවත් ඥාතීන් දෙදෙනෙකු මෙලෙස මියගොස් ඇති බවටයි හෙළිවී ඇත්තේ.
ඔවුන් පසුගිය සිකුරාදා අලුයම මෙලස මියගිය බව විදෙස් මාධ්ය අනාවරණය කළා.
ඔවුන්ගේ නිවෙසෙහි මුරකරු දිවා විවේකයේදී නිවසේ අසාමාන්ය නිශ්ශබ්දතාවයක් ඇති බවට සැක කිරීම හේතුවෙන් කළ සොයා බැලීමේදී යි මෙම කනගාටුදායක මරණ පිළිබඳ තොරතුරු හෙළිවී ඇත්තේ.
පවතින නිහැඬියාව හේතුවෙන් නිවසේ දොර කඩා පැමිණි අසල්වාසීන්ට කාමරවල තිබී සිරුරු සොයා ගැනීමට හැකියාව ලැබුණා.
ඔවුන් සියලුදෙනා නිදා සිටින ඉරියව්වෙන් සිටි අතර, පෙර දින රාත්රියේ ආහාරය අතරතුර වස ශරීරගත වන්නට ඇති බවටයි සැක කෙරෙන්නේ.
මරණ සම්බන්ධයෙන් ඇතිවූ සැකය මත මුළුතැන්ගෙයි උපකරණ පරීක්ෂා කිරීමේදී සුප් භාජනයක් තුළ මියගිය හූනෙකු සොයාගෙන තිබෙනවා.
කෙසේවෙතත් 2019 දී අප්රිකානු බලධාරීන් විසින් සිදු කරන ලද පරීක්ෂණයකින් හෙළි වූයේ හූනන් මාරාන්තික හෝ විෂ සහිත නොවන බවයි.
හූනන් බැක්ටීරියා විශාල ප්රමාණයක් රැගෙන යන නමුත් අනුභව කරන ආහාරවලට වැටුණු පමණින් කෙනෙකු මිය නොයන බවයි විශේෂඥයන් පැවසුවේ.
එක්සත් ජනපදයේ මිචිගන් විශ්ව විද්යාලය විසින් පවත්වාගෙන යනු ලබන සත්ව, දත්ත සමුදාය ද ප්රකාශ කළේ හූනන් විෂ සහිත නොවන අතර මිනිසුන්ට හානිකර නොවන බවයි.
කෙසේවෙතත් එකම පවුලේ සාමාජිකයන් 6 දෙනාගේ මෙම මරණවලට නිශ්චිතව හේතුව වී ඇත්තේ මෙම හූනා ද එසේත් නොමැති නම් වෙනත් කරුණක් ද යන්න මෙතෙක් තහවුරු වී නැහැ.
