ඉන්දියාව විසින් හිරු ගවේෂණය සඳහා නිපදවූ ‘ආදිත්‍ය L1’ රොබෝ යානය රැගත් රොකට්ටුව අද (02) උඩු ගුවන බලා ගමන් ආරම්භ කළා.
මෙම සුවිශේෂී අවස්ථාව දැක බලාගැනීම සඳහා විශාල පිරිසක් එක්ව සිටි බවයි ඉන්දීය මාධ්‍ය වාර්තා කළේ.
ඉන්දීය වේලාවෙන් පෙරවරු 11.50ට මෙම යානය අභ්‍යවකාශ ගත කෙරුණු අතර, පෘථිවි කක්ෂයට ගිය පසු රොකට්ටුවෙන් මුදාහරින රොබෝ යානය, දින 125ක දුර ගමක නියැලීමට නියමිතයි.
එම රොබෝ යානය පෘථිවියේ සිට කිලෝමීටර මිලියන 1.5 ක් එනම් සැතපුම් මිලියන 93ක දුරක පිහිටි ‘ලග්‍රාන්ජ් පොයින්ට්’ Lagrangian Point 1 (L1) යන නමින් හඳුන්වන ස්ථානය වෙත ගොස් සූර්යා නිරීක්ෂණය ඇරඹීමට නියමිතව තිබෙනවා.
ගණිතඥ ජෝසප් ලුවී ලග්‍රෙන්ජ් විසින් සොයා ගන්නා ලද, ලග්‍රාන්ජ් ලක්ෂ්‍ය යනු අභ්‍යවකාශයේ ඇති ස්ථාන දෙකක් අතර ගුරුත්වාකර්ෂණ බලයන් ක්‍රියා කරමින්, අභ්‍යවකාශ යානාවලට අවම ඉන්ධන පරිභෝජනයක් සහිත ස්ථාවර ස්ථානයක පැවතිය හැකි ආකාරයට එකිනෙක තුලනය වන ස්ථානයක් වනවා.
‘ආදිත්‍ය L1’ යානය හිරු ගවේෂණය කරමින්, හිරුගේ ඡායාරූප ගැනීම සිදුකරන අතර, එහිදී එම රොබෝ යානය මඟින් දිනකට හිරුගේ ඡායාරූප 1,440ක් පෘථිවියට වෙත එවීමට නියමිතයි.
මෙම සුවිශේෂී මෙහෙයුම සඳහා වැයවන මුදල පිළිබඳව ඉන්දියානු අභ්‍යවකාශ පර්යේෂණ ඒජන්සිය ප්‍රකාශ කර නොමැති අතර,ඉන්දියානු පුවත්පත්වල වාර්තා වන්නේ එය ඉන්දීය රුපියල් බිලියන 3.78ක් එනම් ඩොලර් මිලියන 46ක් බවයි.
