ඉන්දියාවේ වෛද්‍යවරුන් විසින් කොරෝනා වෛරසය සඳහා කිසිදු අත් බෙහෙතක් හෝ වෛද්‍ය නිර්දේශයක් නොමැති කිසිදු ඖෂධයක් ජනතාවට ලබා ගන්න එපායැයි පවසමින් සිටින අවස්ථාවක ඉන්දියානු පාලක පක්ෂය වන භාරතීය ජනතා පක්ෂයේ මන්ත්‍රීවරුන් විසින් “ගව මුත්‍රා පානය” ප්‍රවර්ධනය කරමින් සිටින බව වාර්තා වෙයි.
ඉන්දීය භාරතීය ජනතා පක්ෂයේ පාර්ලිමේන්තු මන්ත්‍රීවරියක් වන ප්‍රග්‍යා සිං තාකූර් විසින් මෙලෙස ගව මුත්‍රා පානය පිළිබඳව මෙලෙස ජනතාව අතර ප්‍රවර්ධනය කරමින් සිටියි.
මන්ත්‍රීවරිය විසින් අද (17) දිනයේ සහභාගී වු රැස්වීමක් අතර එම ස්ථානයට රැස්ව සිටි ජනතාව අමතමින් ඇය කියා තිබුණේ “අපි ඉන්දියානු ගවයන්ගේ මුත්‍රා පානය කළහොත් අපේ පෙනහළුවලට ආසාදනය ඇති වෙන්නේ නැහැ.මම සෑම දිනකම ගව මුත්‍රා පානය කරමි. ඒ නිසා තමයි මට දැන් කෝවිඩ් නැත්තේ..” යනුවෙනි.
ඇය මේ බව ක්‍රියා තිබුණේ රෝහලකට ඔක්සිජන් ටැංකි 25ක් ලබාදීමට පැමිණි අවස්ථාවේ වන අතර සෞඛ්‍යාරක්ෂිත බව වෙනුවෙන් මුව ආවරණයක් පළඳින්නට යැයි උපදෙස් ලබාදී තිබුණද ඇය එය පිළිපැඳ නොතිබුණි.
ඉන්දියානු මාධ්‍ය වාර්තා කර තිබුණේ ප්‍රග්‍යා සිං තාකූර්ගේ ප්‍රදේශය නියෝජනය කරන අනෙකුත් මන්ත්‍රීවරුන් කොරෝනා වෛරසය මර්දනය කිරීමේ වැඩපිළිවෙළට දායක වී සිටියත් මන්ත්‍රීවරිය පිළිබඳව කිසිදු තොරතුරක් සොයා ගැනීමට නොහැකි වු බවයි.
මීට පෙර භාරතීය ජනතා පක්ෂයේම තවත් පාර්ලිමේන්තු මන්ත්‍රීවරයෙකු වන සුරේන්ද්‍ර සිං විසින් ජනතාව අතර ගව මුත්‍රා පානය කිරීම ප්‍රචලිත කිරීමේ යෙදී සිට තිබුණි. ඔහු විසින් විශේෂ වට්ටෝරුවක් සාදා ප්‍රසිද්ධියේ පානය කිරීමද කර තිබුණි.
ඉන්දියාව තුළ ගොම ශරීරයේ ආලේපනය කිරීම සහ ගව මුත්‍රා පානය එක්වරම ප්‍රචලිත වූ අතර වෛද්‍යවරුන් එය පාලනය කිරීම සඳහා දැඩි වෙහෙසක් දරා තිබුණි. ඉන්දීය වෛද්‍ය සංගමයේ ජාතික සභාපති වෛද්‍ය ජේ.ඒ ජයලාල් විසින් රෝයිටර් පුවත් සේවයට පවසා තිබුණේ කොවිඩ් -19 ට එරෙහිව ප්‍රතිශක්තිය ඉහළ නැංවීම සඳහා ගොම හෝ මුත්‍රා ක්‍රියා කරන බවට ස්ථිර විද්‍යාත්මක සාක්ෂි කිසිම අවස්ථාවක හමු නොවී ඇති බවයි. එමෙන්ම එය මුළුමනින්ම විශ්වාසය මත පදනම් වූවක් බවද හෙතෙම පවසා තිබුණි.
