පශ්චාත් මරණ පරීක්ෂණයක් සිදුකිරිම සඳහා අධිකරණ නියෝගයක් ලබාදී තිබූ මළසිරුරක් දින දෙකකට ආසන්න කාලයක් පානදුර මූලික රෝහලේ තැන්පත් කිරීමට සිදුව ඇති අවාසනාවන්ත පුවතක් පානදුර මුලික රෝහලෙන් වාර්තා වනවා.
වාද්දුව, පොතුපිටිය, ගොරකගහවත්ත මාවතේ පදිංචිව සිට ඊයේ (14) පස්වරුවේ සිය ස්වාමී පුරුෂයාගේ අත් පොරොව පහරකට ලක්ව මියගිය හසිනි හංසිකා රුවන්තිලක යන එක්දරු මවගේ මළසිරුර මෙසේ රෝහල් මෘතශරීරාගාරයේ තැන්පත් කර ඇති බවයි වාර්තා වන්නේ.
එම මියගොස් ඇති කාන්තාවගේ එකම සොයුරිය ද පොරොව පහරකට ලක්ව කොළඹ ජාතික රෝහලේ ප්‍රතිකාර ලබන බවත්, වාර්තා වනවා.
මියගොස් ඇති කාන්තාවගේ මාස දෙකක් වයසැති එකම බිළිඳිය ද සමග අසරණව සිටින ඇයගේ මව ඊයේ (15) පැය ගණනාවක් වාද්දුව පොලිසියේ රැදී සිට නැවත නිවසට හරවා යවා තිබුණා.
මේ පිළිබඳ විමසීමේ දී වාද්දුව පොලිස් ස්ථානාධිපති ප්‍රධාන පොලිස් පරීක්ෂක චාමින්ද්‍ර කුමාර සදහන් කළේ, මහේස්ත්‍රාත් නියෝගය ලබාගෙන ඇති නමුත් පානදුර අධිකරණ වෛද්‍ය නිලධාරීන් විසින් පශ්චාත් මරණ පරීක්ෂණය පසුදින සිදුකරන බව දැනුම් දුන් බවයි.
එමෙන්ම මේ පිළිබඳ විමසීමේ දී පානදුර අධිකරණ වෛද්‍ය නිලධාරීවරයෙක් සඳහන් කර ඇත්තේ, පශ්චාත් මරණ පරීක්ෂණය පසුදින සිදුකිරීමට ඔවුන් තීරණය කර ඇති බවයි.
මේ සම්බන්ධයෙන් සෞඛ්‍ය අංශයේ ඉහළ බලධාරීන්ගේ ද අවධානය යොමු කරන මෙන් එම පවුලේ සාමාජිකයින් ඉල්ලා සිටිනවා.
